முகப்புக் கட்டுரை : உச்சநீதிமன்றத் தீர்ப்பு சமூகநீதிப் போரில் பெற்ற சரித்திர வெற்றி!

 கோ.கருணாநிதி (சமூகநீதிக் கண்காணிப்புக் குழு உறுப்பினர்) மருத்துவப் படிப்பில் அகில இந்திய தொகுப்பு இடங்களில் பிற்படுத்தப்பட்டோருக்கு இதுவரை மறுக்கப்பட்டு வந்த இட ஒதுக்கீடு எனும் அரசமைப்பு சட்டப்படியான உரிமை, உச்ச நீதிமன்றத் தீர்ப்பால் தற்போது உறுதி செய்யப்பட்டுள்ளது. சமூக நீதி வரலாற்றில் மேலும் ஒரு மைல் கல். இந்த சாதனையை வழமைபோல் தமிழ்நாடு சாதித்துக் காட்டியுள்ளது. ஏனைய மாநிலங்களுக்கு ஒரு முன்னோடியாக, வழிகாட்டியாகத் திகழ்கிறது. இந்தச் சாதனை சாதாரணமாக நிகழ்ந்ததல்ல. மக்களிடம் கருத்துருவாக்கம், சட்டப் போராட்டம் எனத் தொடர்ந்து அடிமேல் அடிவைத்து இந்த உரிமையை நாம் பெற்றிருக்கிறோம். இதற்காகப் போராடிய, துணை நின்ற அனைவருக்கும் நமது நன்றி. குறிப்பாக திராவிட முன்னேற்றக் கழகம், அதன் தலைவரும், தமிழ்நாடு முதலமைச்சருமான ‘சமூக நீதிக்கான சரித்திர நாயகர்’ மானமிகு மாண்புமிகு மு.க.ஸ்டாலின் உச்சநீதிமன்றம் வரை சென்று சட்டப் போராட்டம் நடத்தி வெற்றியை பெற்றுத் தந்துள்ளார். தமிழ் கூறும் நல்லுலகம் மட்டுமல்ல; நாடு முழுவதும் இன்று பிற்படுத்தப்பட்டோர் மனமகிழ்ந்து நன்றியைத்  தெரிவித்துக் கொண்டிருக்கிறார்கள். இதற்காக திராவிடர் கழகம், தமிழர் தலைவர் மேற்கொண்ட நடவடிக்கைகள் அசாதாரண-மனவை. ஒவ்வொரு மாநிலமும் ஒவ்வோர் ஆண்டும், மருத்துவ மேற்படிப்புகளில் (PG- எம்.டி, எம்.எஸ். மற்றும் எம்.டி.எஸ்) 50% இடங்களையும், மருத்துவப் படிப்புகளில் (UG-- எம்.பி.பி.எஸ் மற்றும் பி.டி.எஸ்) 15% இடங்களையும் அகில இந்திய தொகுப்பிற்கு மாநிலங்கள் அளிக்கின்றன. இந்த இடங்களுக்கான மாணவர் சேர்க்கையை ஒன்றிய அரசின் சுகாதார மற்றும் குடும்ப நல அமைச்சகத்தின் கீழ் உள்ள சுகாதார சேவைகள் இயக்குநரகம் (DGHS) மற்றும் மருத்துவ கலந்தாய்வு மய்யம் (MCC) இவை மேற்கொள்கின்றன. 2020_-21 கல்வி-யாண்டில், ‘நீட்’ மருத்துவ மேற்படிப்பு மற்றும் பல் மருத்துவ மேற்படிப்பில் மாநிலங்கள் முறையே 7,981 இடங்களையும், 274 இடங்களையும் அகில இந்திய தொகுப்பிற்கு ஒப்படைத்தன. இவ்வாறு மாநிலங்கள் அளித்த எட்டாயிரத்திற்கும் கூடுதலான அகில இந்திய தொகுப்பு இடங்களில் ஓபிசி மாணவர்களுக்கு இடஒதுக்கீடு சதவிகிதம் வழங்கப்படவில்லை என்பது அதிர்ச்சிக்குரிய செய்தியாகும். 2017-ஆம் ஆண்டில் இருந்து தருவிக்கப்பட்ட தகவல்களின் அடிப்படையில் அகில இந்திய தொகுப்பிற்கு மாநிலங்கள் அளித்த இடங்கள் (பட்டப்படிப்பு மற்றும் பட்ட மேற்படிப்பு), 40,842 இடங்களாகும். இதில் பிற்படுத்தப்-பட்டோர்க்கு தரப்பட்ட இட ஒதுக்கீடு சதவீதம் பூஜ்யமே. 27 சதவிகித அடிப்படையில் அளிக்கப்-பட்டிருந்தால், 11,027 ஓபிசி மாணவர்களுக்கு வாய்ப்புக் கிட்டியிருக்கும். இத்தகைய சமூக அநீதியைச் சுட்டிக்காட்டி, கடந்த சில ஆண்டுகளாக, திராவிடர் கழகம் மற்றும் அரசியல் கட்சிகள், நாடாளுமன்ற உறுப்பினர்கள், பிற சமூக அமைப்புகள், சுகாதார மற்றும் குடும்ப நல அமைச்சகத்திடம் கடிதம் எழுதியும், குரல் எழுப்பியும் எந்தப் பதிலும், தீர்வும் இல்லை. இந்த அநீதியை எடுத்துரைத்து திராவிடர் கழகத்தின் தலைவர் ஆசிரியர் கி.வீரமணி அவர்கள் 2020 மே 9-ஆம் தேதி ஓர் அறிக்கையை வெளியிட்டார். மேலும் இந்த சமூக அநீதிக்கு எதிராகப் போராட அனைவருக்கும் ஒரு தெளிவான அழைப்பும் விடுத்தார். அரசியல் கட்சிகளின் தலைவர்கள் திமுக, மதிமுக, சி.பி.அய்., சி.பி.அய். (எம்), விடுதலை சிறுத்தைகள் கட்சி, பா.ம.க. - என அனைத்துக் கட்சிகளும் சமூக நீதியைக் கோரி அறிக்கைகளை வெளியிட்டனர். மேலும், இந்த அரசியல் கட்சிகளில் பெரும்பாலானவை (தி.மு.க., ம.தி.மு.க, காங்கிரஸ், சி.பி.அய்., சி.பி. அய் (எம்), பா.ம.க.) உச்ச நீதிமன்றத்திலும் வழக்குத் தாக்கல் செய்தன. திராவிடர் கழகம் சென்னை உயர் நீதிமன்றத்தில் வழக்குத் தாக்கல் செய்தது. சென்னையில் மே 30-ஆம் தேதி திமுக தலைவர்  மு.க.ஸ்டாலின் தலைமையில் நடைபெற்ற அனைத்துக் கட்சிக் கூட்டத்தில், மருத்துவக் கல்வியில் அகில இந்தியத் தொகுப்பில் பிற்படுத்தப்பட்டோர்க்கு இட ஒதுக்கீடு வழங்கிட மத்திய அரசை வலியுறுத்தி தீர்மானம் நிறைவேற்றப்பட்டது. இந்த விவகாரத்தில் மக்களின் ஆதரவை உணர்ந்த அன்றைய தமிழ்நாடு அரசும் உச்ச நீதிமன்றத்தில் வழக்குத் தாக்கல் செய்தது. சமூக நீதி விஷயத்தில் தமிழ்நாடு எப்போதும் முன்னணியில் உள்ளது. தந்தை பெரியார் தனது வாழ்நாள் முழுவதும் சமூக நீதிக்காகப் போராடினார். இதன் விளைவாக 1951ஆம் ஆண்டில் அரசமைப்புச் சட்டத்தில் திருத்தம் ஏற்பட்டது. இது தமிழ்நாட்டுக்கு மட்டுமல்ல, இந்திய நாடு முழுமைக்கும் அரசமைப்புச் சட்டம் 15 (4)வது பிரிவின் கீழ் கல்வியில் இடஒதுக்கீட்டுக்கு வழி வகுத்தது. தந்தை பெரியாருக்குப் பிறகு, அவரது கொள்கையைப் பின்பற்றி, தமிழர் தலைவர் ஆசிரியர் கி.வீரமணி அவர்களின் தலைமையில் திராவிடர் கழகம், மண்டல் குழுப் பரிந்துரைகளை அமல்படுத்திடக் கோரி 42 மாநாடுகள், 16 போராட்டங்களை நடத்தி, சிறைத்தண்டனை உள்ளிட்ட தியாகங்களைச் செய்துள்ளது. 1979 ஆம் ஆண்டில் எம்.ஜி.ஆர் அரசாங்கத்தால் கொண்டுவரப்பட்ட, பிற்படுத்தப்பட்டோர்க்கு ரூ.9000 பொருளாதார அளவீடு தடுத்து நிறுத்தப்பட்டது. தமிழ்நாட்டில் 69% இடஒதுக்கீட்டைப் பாதுகாப்பதில், திராவிடர் கழகம் போராட்டத்தை நடத்தியதோடு நின்றுவிடாமல், அரசமைப்புச் சட்டம் 31- சி பிரிவின் அடிப்படையில் ஒரு வரைவு மசோதாவை தமிழ் நாடு அரசுக்கு அளித்து, அதன் அடிப்படையில் இட ஒதுக்கீடு சட்டம் தமிழ்நாடு சட்டமன்றத்திலும் பின்னர் அரசியலமைப்பின் 9-ஆம் அட்டவணையில் சேர்க்கப்படுவதற்கும் நாடாளுமன்றத்தால் ஏற்றுக்கொள்ளப்பட வைப்பதிலும் முழுமூச்சாய் செயலாற்றியது. இவ்வாறு, தந்தை பெரியாரின் கொள்கை-களை நிறைவேற்றுவதற்காக, திராவிடர் கழகம், சமூக இயக்கமாக, நாடு முழுவதும் ஒடுக்கப்பட்ட பிரிவினருக்கு சமூக நீதியை வழங்குவதைப் பாதுகாப்பதற்கும் ஊக்குவிப்பதற்கும் அதன் பங்கை தொடர்ந்து செயல்படுத்தி வருகிறது. சமூக நீதி குறித்த விழிப்புணர்வை தொடர்ந்து தமிழ் மக்களிடையே உருவாக்குவதிலும், அனைத்து அரசியல் கட்சிகளை ஒன்றிணைப்-பதிலும், தந்தை பெரியார் உருவாக்கிய திராவிடர் கழகம் அவரது மறைவுக்குப் பின்னரும் தமிழர் தலைவர் தலைமையில் தொடர்ந்து பங்காற்றி வருவதால், தமிழ்நாட்டில் சமூகநீதி காப்பாற்றப்பட்டு வருகிறது. இப்போது மருத்துவ சேர்க்கையில் ஓபிசி பிரிவினர்க்கு இடஒதுக்கீடு மறுக்கப்பட்ட இந்தப் பிரச்சினையில், திராவிடர் கழகம் நாடு முழுவதும் இந்த அநீதியை எதிர்த்து  தீவிரப்படுத்தி வந்தது. இதன் ஒரு முயற்சியாக, இந்தியா முழுவதும் உள்ள பாஜக தவிர்த்த அரசுகளின் பதினோரு முதல்வர்களுக்கும் அதே போன்று, வட மாநில அரசியல் கட்சிகளின் தலைவர்கள், சமூக அமைப்புகளின் தலைவர்கள் என பதினோரு தலைவர்களுக்கும் கடிதம் அனுப்பப்பட்டது. இந்தத் தலைவர்களில் சிலர் திராவிடர் கழகத்தின் முயற்சிகளைப் பாராட்டி, கடிதம் எழுதினர். மருத்துவப் பட்ட மேற்படிப்பில் பிற்படுத்தப்பட்டவர்களுக்கு இட ஒதுக்கீடு தொடர்பாக திராவிடர் கழகம், தி.மு.க. உள்ளிட்ட கட்சிகள் தொடர்ந்த வழக்கில், ஒரு வாரத்தில் பதிலளிக்க ஒன்றிய அரசுக்கு சென்னை உயர் நீதிமன்றம் உத்தரவு பிறப்பித்தது. மருத்துவக் கல்விக்கான மத்திய தொகுப்பில் பிற்படுத்தப்பட்டோருக்கு இட ஒதுக்கீடு அளிப்பதற்கு எந்தத் தடையும் இல்லை என்று 27.7.2020 அன்று சிறப்பான தீர்ப்பினை உயர்நீதிமன்றம் அளித்தது. தீர்ப்பின் சிறப்பு அம்சங்கள்: 1. மாநில சட்டங்களின் அடிப்படையில் இட ஒதுக்கீட்டை அளித்திட, இந்திய மருத்துவக் குழு இயற்றிய விதிகள் [(9(4), 5(5)], அகில இந்திய தொகுப்பில் ஓபிசி பிரிவினர்க்கு இட ஒதுக்கீட்டை மறுக்கவில்லை. (பாரா 85) 2. ஒன்றிய அரசின் கல்வி நிலையங்களில் இட ஒதுக்கீடு வழங்கப்படுகிறது. பிற்படுத்தப் பட்டோர்க்கு அகில இந்திய தொகுப்பில் இட ஒதுக்கீடு மறுக்கப்படுவதற்கு இந்திய மருத்துவக் குழு, எந்த விதியையும் குறிப்பிட இயலவில்லை . (பாரா 86) 3. ஓபிசி பிரிவினர்க்கான இட ஒதுக்கீடுக் கொள்கையை சட்டமாக்குவதற்கு ஒன்றிய அரசுக்கு அதிகாரங்கள் உள்ளன. அதன் அதிகாரங்களைப் பயன்படுத்துவதில் இருந்து தடுக்கப்படவில்லை . (பாரா 87) 4.            யுஜி/பிஜி மருத்துவப் படிப்புகளில் மாநிலங்கள் பங்களித்த அகில இந்திய தொகுப்பு இடங்களில் ஓபிசி பிரிவினர்க்கு இட ஒதுக்கீடு வழங்க எந்த சட்டமோ அல்லது அரசியலமைப்பும் தடையாக இல்லை. (பாரா 90). 5.            அகில இந்திய தொகுப்பு இடங்களில் இட ஒதுக்கீடு இல்லை என்பதை மாநில அரசுகள் அறிந்திருப்பதாக MCI வாதம் செய்கிறது. ஆனால், தமிழ்நாடு அரசு இட ஒதுக்கீட்டு மனுவை தாக்கல் செய்துள்ளதன் மூலம் MCIஇன் வாதம் மறுக்கப்பட்டதாகி விடுகிறது. (பாரா 95). 6. இந்திய மருத்துவக் குழு, மாணவர் சேர்க்கைக்கான தரங்களை நிர்ணயிக்க முடியும். ஆனால், இடஒதுக்கீடுக் கொள்கை அரசாங்கத்தின் சட்டத்தின் மூலமாகவோ அல்லது நீதிமன்றத்தின் எந்தவொரு உத்தரவு மூலமாகவோ செய்யப்பட வேண்டும். (பாரா 97) 7. தமிழ்நாடு மனுதாரர்களின் மனுவில் ஓபிசிக்கு 50% இட ஒதுக்கீடு தமிழ்நாடு இட ஒதுக்கீடு சட்டத்தின் அடிப்படையில் கோரப் பட்டுள்ளது. இது ஒன்றிய அரசின் யோசனைக்கு மாறாக உள்ளது. (பாரா 98) 8.            சமூகநீதி, சமத்துவம் போன்றவற்றைப் பாதுகாப்பதற்கான முந்தைய வழக்குகளில் உச்ச நீதிமன்றங்களின் தீர்ப்புகளை விசிமி மற்றும் ஒன்றிய அரசு புறக்கணிக்க முடியாது. (பாரா 102) 9.            இந்த விஷயத்தில் ஒரு முடிவை எடுக்க ஒன்றிய அரசுக்கு அரசியலமைப்பு கடமை உள்ளது, இது இப்போது அவசியமாக உள்ளது. (பாரா 104) 10.         மூன்று உறுப்பினர்களைக் கொண்ட குழு _- ஒன்றிய அரசின் சுகாதார செயலாளர், MCI மற்றும் தமிழ்நாடு அரசின் சுகாதார செயலாளர், இட ஒதுக்கீடு சதவிகிதத்தை முடிவு செய்ய அமைக்கப்பட வேண்டும். 11.         செயல்படுத்தல் தற்போதைய கல்வியாண்டில் அல்ல, எதிர்கால ஆண்டுகளிலும் செய்யலாம். (பாரா 105) 12.         இடஒதுக்கீடு சதவிகிதத்தை அமல்படுத்துவது தொடர்பான குழுவின் வழிமுறைகளை ஒன்றிய அரசு மூன்று மாதங்களுக்குள் அறிவிக்க வேண்டும். (பாரா 106) இந்த தீர்ப்பின் மூலம், ஒன்றிய அரசின் மருத்துவக் கவுன்சிலுக்கான அதிகாரம், இட ஒதுக்கீட்டில் நுழைய முடியாது என்பதை நீதிமன்றம் தெளிவாக்கியது. மேலும், இட ஒதுக்கீட்டைத் தருவதில் எந்த நீதிமன்றத் தடையும் இல்லை என்பதையும் உறுதிப்படுத்தியது. ஆனாலும், மூன்று மாதத்தில் ஒன்றிய அரசு எந்த முடிவையும் எடுக்காமல் காலம் தாழ்த்தி வந்த நிலையில், நீட் மதிப்பெண் அடிப்படையில் மருத்துவப் படிப்புக்கான கலந்தாய்வு நடத்திட முடிவு செய்தது. இதனை எதிர்த்து, திராவிட முன்னேற்றக் கழகம் நீதிமன்ற அவமதிப்பு வழக்கைத் தொடர்ந்தது. சென்னை உயர் நீதிமன்றமும், 27 சதவிகித இட ஒதுக்கீட்டை பிற்படுத்தப்பட்டோருக்கு நடைமுறைப்படுத்தாமல் நீட் மதிப்பெண் அடிப்படையில் கலந்தாய்வு நடத்திட தடை விதிக்க நேரிடும் என எச்சரித்ததன் அடிப்படியில் ஒன்றிய அரசு ஜூலை 2021இல் ஆணை பிறப்பித்தது. இந்த ஆணையில், மிகுந்த போராட்டத்தின் காரணமாக பிற்படுத்தப் பட்டோருக்கு 27 சதவிகிதம் என்பதுடன், உயர்ஜாதியில் பொருளாதாரத்தில் பின்னடைந்தோர் என்ற அடையாளத்துடன் 10 சதவிகிதம் இட ஒதுக்கீடு என்பதையும் இணைத்தே வெளியிட்டது ஒன்றிய அரசு. இந்த இட ஒதுக்கீடுகளை எதிர்த்து உச்ச நீதி மன்றத்தில் தொடரப்பட்ட வழக்கின் காரணமாக சென்ற ஆண்டு நடைபெற வேண்டிய மருத்துவப் படிப்பு கலந்தாய்வு தள்ளி வைக்கப்பட்டது. பிற்படுத்தப்பட்டோருக்கு கிடைத்திட வேண்டிய 27 சதவிகித இட ஒதுக்கீடு தள்ளிப் போனது. இந்த வழக்கில், ஒன்றிய அரசு முன்னுக்குப் பின் முரணாக தனது வாதங்களையும் பிரமாணப் பத்திரத்தையும் தாக்கல் செய்தது. இ.டபிள்யூ.எஸ். என்ற உயர்ஜாதி ஏழைகளுக்கான இட ஒதுக்கீட்டில் ஓபிசி பிரிவினர்க்கான அதே எட்டு லட்சம் ரூபாய் என்ற வருமான வரம்பு குறித்த உச்சநீதி மன்றத்தின் கேள்விகளுக்கு ஒன்றிய அரசின் வழக்குரைஞர் உரிய பதிலைத் தரவில்லை. மாறாக, மூன்று நபர் கொண்ட குழுவை நியமித்து, வருமான வரம்பை நியாயப்படுத்தித் தந்ததையும் உச்ச நீதிமன்ற நீதிபதிகள் குறிப்பாக நீதியரசர் டி.ஒய்.சந்திரசூட் ஏற்றுக் கொள்ளவில்லை. வருமான வரி கட்டும் ஒருவர் எப்படி பொருளாதாரத்தில் பின் தங்கியவராக முடியும் என கிடுக்கிப் பிடி போட்டார் நீதியரசர். இறுதியாக 7.1.2022 அன்று அளித்த தீர்ப்பில் பிற்படுத்தப்பட்டோருக்கு ஒன்றிய அரசு பிறப்பித்த 27 சதவிகித ஆணையை உறுதிப்படுத்தி தீர்ப்பளித்துள்ளனர் நீதிபதிகள். அத்துடன் இந்த ஆண்டு மருத்துவ கலந்தாய்வில் உயர்ஜாதி ஏழைகளுக்கான 10 சதவிகித இட ஒதுக்கீடு தொடரும் என்றும், வரும் மார்ச் மாத இறுதி வாரத்தில் இது குறித்த இறுதித் தீர்ப்பினை வழங்குவோம் என்றும் கூறியுள்ளார்கள். நெடிய போராட்டத்தின் காரணமாக இத்தனை ஆண்டுகள் பிற்படுத்தப்பட்டோருக்கு மறுக்கப்பட்டு வந்த இட ஒதுக்கீடு இந்த ஆண்டு முதல் அகில இந்திய தொகுப்பு இடங்களிலும் வழங்கப்படும். இதன் மூலம் நான்காயிரத்திற்கும் அதிகமான மருத்துவப் படிப்பு இடங்களை (இளங்கலை மற்றும் முதுகலை) பிற்படுத்தப்பட்டோர் முதன் முறையாகப் பெறுவார்கள். வரலாற்றுச் சிறப்புமிக்க இந்தத் தீர்ப்பினை வழங்கிய மாண்பமை நீதிபதிகள் டி.ஒய்.சந்திரசூட் மற்றும் கோபண்ணா ஆகியோருக்கு நமது நன்றி. இந்த சட்டப் போராட்டத்தைத் தொடர்ந்து நடத்தி வெற்றி கண்ட தமிழ்நாடு முதலமைச்சர் அவர்களுக்கு நமது பாராட்டுகள். மேலும், நீதிமன்றத்தில் திறம்பட வாதம் செய்த தி.மு.க. மாநிலங்களவை உறுப்பினர், மூத்த வழக்குரைஞர் பி.வில்சன் அவர்களுக்கும் நமது நன்றியையும் பாராட்டையும் தெரிவித்துக் கொள்கிறோம். இந்த வெற்றியின் மூலம் தமிழ் நாடு சமூக நீதி மண்; தந்தை பெரியார் மண் என மீண்டும் நிரூபணம் ஆகியுள்ளது. இருப்பினும் இது முதல் கட்ட வெற்றியே. நாம் கேட்டது அந்தந்த மாநிலத்தில் உள்ள இட ஒதுக்கீடு அடிப்படையில் அகில இந்திய தொகுப்பு இடங்களில் இடம் தரப்பட வேண்டும் என்பதே. மாறாக, 27 சதவிகிதமே கிடைத்துள்ளது. தமிழ்நாடு முதலமைச்சர் தனது அறிக்கையில் கூறியிருப்பது போல், அகில இந்திய தொகுப்புக்கு இடங்கள் ஒதுக்கப்படும் முறைக்கு முற்றுப்புள்ளி வைத்து, நூறு சதவிகித இடங்களையும் அந்தந்த மாநிலங்களே நிரப்பும் நடைமுறை வர வேண்டும் என குறிப்பிட்டிருப்பது சரியானது. அதனை நாம் நிறைவேற்றிட தொடர்ந்து போராட வேண்டும். நாடெங்கிலும் உள்ள அனைத்து சமூக நீதி சக்திகளையும் ஒருங்கிணைப்பதன் மூலம், சமூக நீதிக்கான போரில் நாம் வெற்றி பெறுவது உறுதி, அதை நோக்கி, நாம் ஒற்றுமையாக முன்னேறுவோம்.செய்திகளை பகிர்ந்து கொள்ள

தலையங்கம் : ம.பி.யில் ஆதிசங்கரருக்கு அரசு செலவில் ஆடம்பரமா? மதச்சார்பின்மை காற்றில் பறக்கிறது!

மத்தியப் பிரதேசத்தில் சவுகான் தலைமையில் இன்று நடைபெறும் பா.ஜ.க. ஆட்சி, பொதுத் தேர்தலில் பெருவாரியான மக்கள் வாக்குகளைப் பெற்று அமைந்த ஆட்சி அல்ல; காங்கிரஸ் ஆட்சிதான் மக்களால் தேர்ந்தெடுக்கப்பட்ட ஆட்சி. அதனைக் கவிழ்த்து, ‘ஆயாராம், காயாராம்’ குதிரை பேர எம்.எல்.ஏக்கள் மூலம் கமல்நாத்  தலைமையிலான காங்கிரஸ் ஆட்சியைக் கவிழ்த்தே ஓர் ஆண்டுக்கு முன்பு ஆட்சி அமைந்த அரசு. அதில் அப்பட்டமான ஹிந்துத்துவா ஆட்சியை அவர்கள், பசு பாதுகாப்பில் தொடங்கி, 9.1.2022 அன்று விசித்திர அறிவிப்பாக ஆதிசங்கரருக்கு 108 அடி உயர உலோகத்திலான சிலை, 54 அடி பீடம் -_ 2000 கோடி ரூபாய் செலவில் காட்சியகம் (மியூசியம்) _ குருகுலம் _ மதப் பயிற்சி நிலையம் என்றெல்லாம் மத்தியப் பிரதேச அரசு செலவில் செய்யவிருப்பதை அந்த முதல் அமைச்சர் சவுகான் (பாஜ.க.) கூறியிருக்கிறார்! மத்தியப் பிரதேச அரசு ஏற்கெனவே இரண்டரை லட்சம் கோடி கடனில் தனது நிருவாகத்தை நடத்தும் ஓர் மாநில அரசு! இந்த லட்சணத்தில் ஆதிசங்கரருக்கு அங்கே சிலை _ காட்சியகம் எல்லாம்! பா.ஜ.க.வின் கட்சிச் செலவில் அவர் செய்ய முன்வந்தால் அதுபற்றி நாம் கவலைப்படப் போவதில்லை. மக்கள் வரிப்பணத்தை எடுத்து _ அதுவும் கடனில் தத்தளிக்கும் ஒரு மாநில அரசு _ இத்தகைய டம்பாச்சாரி _ வீண் ஆடம்பரத்திற்கு செலவழிக்கப் போவதாகக் கூறுவது எவ்வகையில் நியாயமாகும்? வன்மையான கண்டனத்திற்கு ஆளாக வேண்டும்! அரசின் மதச்சார்பற்ற தன்மை என்ற அரசியல் சட்ட நெறிமுறையைக் குழிதோண்டிப் புதைத்து அதன்மீது இப்படி _ வர்ணாசிரமத்தைப் பரப்பிடவே நாட்டின் நான்கு பகுதிகளிலும் சென்று மடங்கள் அமைத்து, ஜாதியை ஒழிக்கவும் பெண்ணடிமையை மாய்க்கவும் பகுத்தறிவை வளர்க்கவும் தோற்றுவிக்கப்பட்ட _ பரப்பப்பட்ட பவுத்தத்தை ஒழித்துக் கட்டிட முயற்சி எடுத்தார் ஆதிசங்கரர் என்பதைத் தவிர, அவரது சாதனை வேறு என்ன? இன்று வற்புறுத்தப்படும் அனைவரையும் இணைக்கும் ‘Inclusive Growth’ ‘யாவரும் கேளிர்’ தத்துவத்திற்கு எதிராக வர்ண தர்மத்தைப் போதித்தவர் என்பதைத் தவிர வேறு என்ன? பா.ஜ.க., ஆர்.எஸ்.எஸ். தலைமேல் தூக்கி வைத்துக் கொண்டாடும் விவேகானந்தர், ஆதிசங்கரரைப் பற்றி என்ன கூறியுள்ளார்? ‘அவரது அறிவு கூர்மையானதல்ல, அது மனித விரோதமானது, என்ற கருத்துப்படக் கூறவில்லையா? பின் இவருக்கு ஏன் இப்படி 2,000 கோடி செலவு. அதுவும் அரசுப் பணத்தில்! தந்தை பெரியார் என்ற சமூகப் புரட்சியாளருக்கு அவரது அறக்கட்டளையின் மூலமாக, பொதுமக்களின் ஆதரவோடு ‘திருச்சி _சிறுகனூர் அருகே’ 30 ஏக்கர் நிலத்தில் பல்வேறு அறிவியல் அடிப்படையில் புது உலகத்தைக் குழந்தைகளுக்கும் போதிக்கும் வகையில் அமையவிருக்கும் ‘பெரியார் உலகம்’ பற்றி வாய் கிழிய வக்கணை பேசிய வம்பர்கள் இதுகுறித்து ஏன் மவுனம் சாதிக்கின்றனர். இவர்களையும் நாடும் உலகமும் புரிந்து-கொண்டால் இவர்களது இரட்டை வேடமும் பா.ஜ.க.வின் ஆரிய சனாதனப் பற்றும் அம்பலமாகும். - கி.வீரமணி, ஆசிரியர், உண்மைசெய்திகளை பகிர்ந்து கொள்ள

பி.ஜே.பி அரசு செய்தது என்ன?

  சென்னை உயர் நீதிமன்ற ஆணைப்படி அமைக்கப்பட்ட மூன்று அதிகாரிகள் கொண்ட குழுவின் பரிந்துரையையும் ஒன்றிய அரசு நடவடிக்கை எடுக்காமல் இருந்தது. இவ்வாறு, ஆணையம், நீதிமன்றம், பிற்படுத்தப்பட்டோருக்கு இட ஒதுக்கீடு அளித்திட உத்தரவிட்ட நிலையிலும் இட ஒதுக்கீடு இல்லாமல் 31.12.2020 அன்று நீட் மதிப்பெண் அடிப்படையில் மருத்துவப் படிப்புக்கான மாணவர் சேர்க்கை பட்டியலை ஒன்றிய அரசின் சுகாதாரத்துறை வெளியிட்டது. இதற்கு எதிர்ப்புத் தெரிவித்து தி.மு.க. தொடர்ந்த நீதிமன்ற அவமதிப்பு வழக்கினை சென்னை உயர் நீதிமன்றம் ஏற்றுக் கொண்டு 1.3.2021 அன்று ஒன்றிய அரசுக்கும் தமிழ்நாடு அரசுக்கும் உரிய பதிலளிக்க தலைமை நீதிபதிகள் சஞ்சீப் பானர்ஜி மற்றும் செந்தில்குமார், ராமமூர்த்தி ஆகியோர் உத்தரவிட்டனர். மேலும் சென்னை உயர் நீதிமன்றம் 19.7.2021 அன்று ஒன்றிய அரசு 2021_-22 மருத்துவப் படிப்பிலும் ஓபிசி இட ஒதுக்கீடு இல்லாமல் மாணவர் சேர்க்கை நடத்திடும் முடிவுக்கு கடும் கண்டனத்தைத் தெரிவித்தனர். ஒரு வாரத்தில் பதில் அளிக்கவும் உத்தரவிட்டனர். இதற்கு மேலும் தாமதிக்க முடியாது என்ற நிலையில் தான், மோடி அரசு ஜூலை 29, 2021-இல் பிற்படுத்தப்பட்டோருக்கு 27 சதவிகித ஆணையை பிறப்பித்தது. கூடவே, இ.டபிள்யூ.எஸ் பிரிவினருக்கும் (அவர்கள் எதுவும் கேட்காமலேயே) 10 சதவிகிதம் அளிக்கப்படும் என்பதையும் இணைத்து வெளியிட்டனர். இந்த ஆணையை எதிர்த்து உச்ச நீதிமன்றத்தில் தொடரப்பட்ட வழக்கில் தி.மு.க. தன்னையும் இணைத்து கொண்டு வாதாடி வெற்றி பெற்றுள்ளது. பிற்படுத்தப்பட்டோருக்கான இட ஒதுக்கீடுப் பிரச்சினையில் ஒரு துரும்பையும் எடுத்துப் போடாத பாஜக, தற்போது தங்களால்தான் இது சாத்தியமானது என்பது கேலிக்குரியது.செய்திகளை பகிர்ந்து கொள்ள

துணைவேந்தர்கள் நியமனம் மீண்டும் மாநில அரசின் அதிகாரத்துக்குக் கொண்டுவர தமிழ்நாடு அரசு தீர்மானம் கொண்டுவருவது வரவேற்கத்தக்கது!

ஆளுநர் பல்கலைக் கழகங்களின் வேந்தராக இருப்பது என்பது Ex-officio  என்ற தகுதியின் மூலம்தான். அதன்படி அவரது அதிகாரம் அமைந்ததால்தான் அதற்கு முன்பு, கலைஞர், ஜெயலலிதா ஆகியோர் முதலமைச்சர்களாக இருந்த காலம்வரை, தமிழ்நாடு அரசு கருத்துப்படியே அதன் அதிகாரத்திற்குட்பட்டே துணை வேந்தர்கள் நியமனம் நடைபெற்றுள்ளது. இந்த நடைமுறை மாற்றத்தினால் பல்வேறு விரும்பத்தகாத நிகழ்வுகள்கூட பல்கலைக் கழகங்களின் மாண்புகளைக் குலைக்கும் வகையில் நடைபெற்று அவமரியாதையும், அவற்றிற்கு ஏற்பட்ட விரும்பத்தகாத நிலையும் உள்ளது! ஆளுநரால் அப்படி நியமிக்கப்பட்ட பல துணைவேந்தர்கள் மீது ஏராளமான குற்றச்சாட்டுகளும், ஒழுங்கீனங்களும் நடைபெற்றன என்பதும் கடந்தகால மறுக்க முடியாத வரலாறு. இந்த நடைமுறை மாற்றத்தினை - அதாவது ஒன்றிய அரசால் நியமிக்கப்படும் ஆளுநர்கள், கல்வியைக் காவிமயமாக்கிட இப்படி ஒரு வாய்ப்பைப் பயன்படுத்துவது மிகவும் தவறான நடவடிக்கையாகும்! கடந்த 4 ஆண்டுகளாக முன்பிருந்த ஆட்சி (அ.தி.மு.க. ஆட்சிக்கு ஏற்பட்ட மடியில் கனம் காரணமாக) ஆளுநரின் இந்த அதீத நடவடிக்கையை எதிர்த்து மூச்சு விடக்கூட அஞ்சியது அகிலம் அறிந்த ஒன்று. இவை ஏதோ ஒரு சில நியமனங்கள்தானே என்று அலட்சியமாக இருந்துவிட முடியாது; கூடாது. காரணம், இரண்டு வகை ஆபத்துகள் இதன்மூலம் ஏற்படுகின்றன. 1. மாநில அரசின் உரிமை பறிக்கப்படும் கொடுமை 2. உயர்கல்வியைக் காவி மயமாக்கும் உபாயம். ஆகவேதான் நாடு தழுவிய எதிர்ப்பு மலைபோல் கிளம்பியுள்ளது! கேரளாவில், மேற்கு வங்கத்தில் மட்டும் எதிர்ப்பல்ல; நமது உயர்கல்வித் துறை அமைச்சர் 6.1.2022 அன்று தமிழ்நாடு சட்டமன்றத்தில் கூறியபடி, இன்றைய பிரதமர் மோடி, குஜராத் முதலமைச்சராக இருந்தபோதுகூட, ஆளுநர், துணைவேந்தர்களை நியமிக்கும் அதிகாரம் - நடைமுறை கூடாது; அது மாநில முதலமைச்சர்களின் அதிகாரம் என்ற நிலைப்பாட்டினை எடுத்ததுபற்றி தெரிவித்துள்ளது குறிப்பிடத்தக்கது. நமது முதலமைச்சர் மு.க.ஸ்டாலின் அவர்களது தமிழ்நாடு சட்டமன்ற அறிவிப்பு - ‘’மாநிலங்களில் உள்ள பல்கலைக் கழகங்களில் துணைவேந்தர்கள் நியமனத்தை அந்தந்த மாநில அரசுகளே மேற்கொள்ள வகை செய்யும் தீர்மானத்தை அடுத்து வரும் நிதிநிலை கூட்டத் தொடரில் நிறைவேற்றப்படும்’’ என்ற அறிவிப்பு வரவேற்கவேண்டிய காலத்தின் கட்டாய அறிவிப்பாகும்! ‘’உறவுக்குக் கை கொடுத்தாலும் - உரிமைக்கு என்றும் குரல் கொடுக்க தி.மு.க. தயங்காது’’ என்பதைப் பலருக்குப் பிரகடனப்படுத்தும் நல்ல அறிவிப்பாகும். விரைந்து செய்க - இந்த நிறைவான செயலுக்குப் பாராட்டும், வாழ்த்தும்! - கி.வீரமணி தலைவர், திராவிடர் கழகம்செய்திகளை பகிர்ந்து கொள்ள

அய்யாவின் அடிச்சுவட்டில்... இயக்க வரலாறான தன் வரலாறு (285)

எனக்கு எடைக்கு எடை தங்கம் வழங்கப்பட்ட தஞ்சை மாநாடு கி.வீரமணி தந்தை பெரியார், அன்னை மணியம்மையார் ஆகியோரிடம் பேரன்பு கொண்டவரான தமிழர் தேசிய இயக்கத்தின் பொதுச் செயலாளர் எம்.கே.டி.சுப்பிரமணியன் _ இராஜம்மாள் ஆகியோரின் பேத்தியும், சென்னை ஞா.சித்தரஞ்சன் _ தங்கம்மாள் ஆகியோரின் செல்வியுமான சி.விஜயகீதாவுக்கம்; இராஜபாளையம் இராமலிங்காபுரம் கா.இடும்பசாமி _ மனோரமா தேவி ஆகியோரின் மகன் இ.சிவகுமாருக்கும் வாழ்க்கைத் துணை நல ஒப்பந்த விழா 18.1.1998 அன்று தண்டையார்பேட்டை இராமசாமி திருமண மண்டபத்தில் நடைபெற்றது. இவ்விழாவில் பழ.நெடுமாறன், அனைத்துக் கட்சியின் முக்கிய பிரமுகர்களும், பொதுமக்களும் கலந்து கொண்டனர். மணமக்களுக்கு தந்தை பெரியாரின் புத்தகங்களை அன்பளிப்பாக வழங்கி வாழ்த்தினேன். திருச்சி நாகம்மையார் குழந்தைகள் இல்லத்தைச் சேர்ந்த ஈ.வெ.ரா.ம.ஞானவதியின் மணவிழாவை 19.1.1998 அன்று திருச்சி பெரியார் நூற்றாண்டுக் கல்வி வளாகத்தில் தலைமையேற்று நடத்தி வைத்தேன். தந்தை பெரியார், அன்னை மணியம்மையார் மற்றும் என்னால் வளர்க்கப்பட்ட செல்வி ஈ.வெ.ரா.ம.ஞானவதியையும், புதுக்கோட்டை காமராசபுரம் வெ.சுப்பிரமணியம், சங்கியம்மாள்  ஆகியோரின் செல்வன் சு.ராசேந்திரனையும் வாழ்க்கைத் துணை நல ஒப்பந்த உறுதி மொழியினைக் கூறச் செய்தும், மாலை மாற்றிக் கொள்ளச் செய்தும் மணவிழாவை நடத்தி வைத்தேன். விழாவில் கல்வி நிறுவன ஆசிரியர்கள், பேராசிரியர்கள், கழகப் பொறுப்பாளர்கள் பெருமளவில் கலந்து கொண்டனர். இந்த மணவிழா நாகம்மையார் குழந்தைகள் இல்லத்தில் வளர்க்கப்பட்ட பெண்களில் 20ஆவது வாழ்க்கைத் துணை நல ஒப்பந்த விழாவாகும். உரத்தநாட்டில் ஒக்கநாடு மேலையூர் லெ.பழனிவேல் _ அஞ்சம்மாள் ஆகியோரின் செல்வன் ப.துரைராசுக்கும், வடக்கூர் ஆறுமுகம்_ பூரணம் ஆகியோரின் செல்வி ஆ.அல்லிராணிக்கும் வாழ்க்கைத் துணைநல ஒப்பந்த விழா 23.1.1998 அன்று ரெங்கமணி திருமண அரங்கத்தில் நடைபெற்றது. விழாவிற்கு தலைமையேற்று மணமக்களை வாழ்க்கைத் துணை நல ஒப்பந்த உறுதிமொழியினை பின்பற்றிக் கூறச் செய்து, மாலை மாற்றிக் கொள்ளச் செய்து சிறப்புடன் நடத்திவைத்தேன். விழாவில் உரையாற்றுகையில், “பெண்களுடைய அறிவு, மானம், வீரத்தை வலியுறுத்தி பகுத்தறிவு நெறியில் வாழவேண்டும் என்பதையும், பெண்ணடிமை புராணக் கதைகளைப் படிக்காமல், ராக்கெட்டில் விண்வெளிப் பயணம் செய்து கொண்டிருக்கின்ற கல்பனா சாவ்லாவைப் பற்றி படிக்கவும், பேசவும் வேண்டும். பெண்கள் அழகைப் பற்றிக் கவலைப்படக் கூடாது. அறிவைப் பற்றிக் கவலைப்பட வேண்டும். அது உலக அளவில் அவர்களை உயர்வடையச் செய்யும்’’ என பல கருத்துகளை எடுத்துக் கூறினேன். மணவிழாவில் அனைத்துக் கட்சியின் முக்கியப் பிரமுகர்களும், கழகப் பொறுப்பாளர்களும், பொதுமக்களும் பெருமளவில் கலந்து கொண்டனர். சுயமரியாதை வீரர் முதுபெரும் பெரியார் பெருந்தொண்டர் நீடாமங்கலம் மானமிகு எஸ்.சரவணன் அவர்கள், அவரின் மகனது கல்லக்குடி (டால்மியாபுரம்) இல்லத்தில் காலமானார் என்ற செய்தியை 24.1.1998 அறிந்து மிகவும் வேதனையும் துயரமும் அடைந்தோம். தோழர் சரவணன் அவர்கள் அண்ணாமலைப் பல்கலைக்கழகத்தில் பயின்ற காலத்திலேயே மிகவும் தீவிரமான திராவிடர் கழகப் பற்றாளர். நீடாமங்கலத்தில் திராவிட மாணவர் மாநாடு நடத்தப் பெரிதும் காரணமானவர். முதுபெரும் சுயமரியாதை வீரரான நீடாமங்கலம் மானமிகு அ.ஆறுமுகம் அவர்கள், முல்லைவாசல் அய்யா மானமிகு ரத்தினசபாபதி நீடாமங்கலம் விசுவநாதன் ஆகியவர்களுடன் மிக நெருக்கமாக ஒன்றிணைந்து அப்பகுதியில் இயக்கம் வளர்த்தவர். இளைஞர்களை ஈர்த்தவர். 1957இல் ஜாதி ஒழிப்புப் போராட்டமான அரசியல் சட்டத்தாளை அய்யாவும், கழகத்தினரும் கொளுத்தி பல்லாயிரக்கணக்கில் சிறை புகுந்த நேரத்தில், தனது விற்பனை வரித்துறை அதிகாரி பதவியில் நீண்ட விடுமுறை போட்டு விட்டு, ‘விடுதலை’யின் மேலாளர் பொறுப்புப் பணிகளைச் செய்ய முன்வந்து, அதனால் காங்கிரஸ் அரசின் இடர்ப்பாடுகள், தொல்லைகளைச் சந்தித்து, பிறகு வெற்றியுடன் வெளியே வந்தவர். ‘இராவணன்’ என்ற புனை பெயரில் எழுதவும் செய்வார். பழைய திராவிட இயக்க நீதிக்கட்சி மற்றும் லண்டன் ஆர்.பி.ஏ. நூல்களை நம்மிடம் தந்து, பிரச்சாரத்திற்குப் பயன்-படுத்துங்கள் என்று கூறி ஊக்கமூட்டிய பெருந்தகை. ஓய்வுபெற்று பல ஆண்டுகள் ‘விடுதலை’ குடும்பத்தில் மீண்டும் இணைந்து இருந்து பிறகு ஊருடன் சென்றவர். அவருக்கு வீரவணக்கத்தினை கழகம் செலுத்தியதுடன் குடும்பத்தினருக்கு நமது ஆழ்ந்த இரங்கலையும் தெரிவித்துக் கொண்டோம். திருவாரூர் மாவட்டம் கண்-கொடுத்தவனிதம் அரசினர் உயர்நிலைப் பள்ளியில் தந்தை பெரியார் கட்டடத் திறப்பு விழா 25.1.1998 அன்று மிகச் சிறப்பாக நடைபெற்றது. கட்டடத்தைத் திறந்து வைத்து கூடியிருந்த தோழர்கள் முன் சிறப்புரையாற்றினேன். மாவட்ட தி.க. தலைவர் எஸ்.எஸ்.மணியம் தலைமை வகித்தார். இரண்டு இலட்ச ரூபாய் மதிப்புள்ள இக்கட்டடத்தை பெரியார் அறக்கட்டளை சார்பில் கட்டப்பட்டது சிறப்புமிக்கதாகும். இப்பணியை முடிக்க உறுதுணை புரிந்த கழக இளைஞரணித் தோழர் சேதுராமனுக்கு விழாக்குழு சார்பாக சால்வை அணிவித்து கவுரவித்தோம். நிகழ்வில் பேராசிரியர்கள், ஆசிரியர்கள், கழகப் பொறுப்பாளர்கள், பள்ளி மாணவ _ மாணவிகள் ஏராளமானோர் கலந்துகொண்டு சிறப்பித்தனர். மதுரையில் பகுத்தறிவு எழுத்தாளர் மன்ற மாநிலத் தலைவர் பேராசிரியர் மு.இளமாறன் _ வைரமணி ஆகியோரின் செல்வி வாகை மலருக்கும், விருதுநகர் அ.சந்திரன்_பவளமணி ஆகியோரின் செல்வன் சிறீராமுவுக்கும் வாழ்க்கை ஒப்பந்த விழாவை 1.2.1998 அன்று கே.எஸ்.புன்னைவனம் திருமண மன்றத்தில் தலைமையேற்று நடத்தினேன். அப்போது மணமக்களை மாலை மாற்றிக் கொள்ளச் செய்தும், உறுதிமொழி ஏற்கச் செய்தும், மணவிழா சிறப்புடன் நடத்தப்பட்டது. விழாவிற்கு பல்வேறு கட்சிகளைச் சார்ந்தவர்களும், பொதுமக்களும் பெருமளவில் கலந்துகொண்டனர். இதனைத் தொடர்ந்து தஞ்சையில் நடக்கவிருக்கும் மனிதநேய மாநாட்டிற்குப் புறப்பட்டேன். தஞ்சையில் கழகத்தின் சார்பில் நடத்தப்பட்ட மனிதநேய மாநாடு தஞ்சை மாநகரமே குலுங்கும் அளவுக்கு 1.2.1998 அன்று சிறப்பான திட்டமிடலுடனும், வரவேற்புடனும் நடைபெற்றது. மாநாட்டையொட்டி நடந்த பேரணியில் இரதத்தில் என்னை அமரவைத்து அழைத்து வந்தனர். சிறப்பான கலைநிகழ்ச்சி-யோடு நடைபெற்ற பேரணி எட்டு மணிக்கு திலகர் திடலை அடைந்தது. மனிதநேய மாநாட்டுக்கு இந்தியப் பகுத்தறிவாளர் சங்கத்தின் தலைவர் சேனல் இடமருகு (டில்லி), இங்கிலாந்து நாத்திகர் மால்கம் ஒவன்ரீஸ், சிங்கப்பூர் பெரியார் பெருந்தொண்டர் முருகு.சீனிவாசன் எஸ்.டி.-மூர்த்தி, தி.நாகரத்தினம், தமிழ்மறையான், மலேசிய தி.க. தேசியத் தலைவர் ரெ.சு.முத்தய்யா, திராவிடமணி நல்லதம்பி, டத்தோ பாலகிருஷ்ணன், திருச்சுடர் கே.ஆர்.-ராமசாமியின் குடும்பத்தினர், கருநாடக மாநிலம் பிற்படுத்தப்பட்டோர் நலக்குழுவின் உறுப்பினர் என்.வி.நரசிம்மையா, தமிழர் தேசிய இயக்கத் தலைவர் பழ.நெடுமாறன், பெரியார் பன்னாட்டு அமைப்பின் பொறுப்பாளர்களுள் ஒருவரான பேராசிரியர் டாக்டர் இலட்சுமண் எஸ்.தமிழ் (இலக்குவன்தமிழ்), சிகாகோ டாக்டர் சோம.இளங்கோவன், இங்கிலாந்து நாட்டின் இணையற்ற பெரியார் பெருந்தொண்டர் செல்வநாயகம், பி.பி.சி. தமிழோசை புகழ் சங்கரமூர்த்தி இன்னும் பல வெளிநாட்டு தமிழ் ஆர்வலர்கள் கலந்துகொண்டு கழகத்தின் செயல்பாடுகளையும், கழகம் செய்துவரும் பகுத்தறிவுப் பிரச்சாரத்தையும் வாழ்த்திப் பேசினார்கள். கழகப் பொறுப்பாளர்களின் அன்புக்கிணங்க மேடையிலே ஒரு பெரிய தராசினைக் கொண்டுவந்து ஒரு தட்டில் என்னையும், மற்றொரு தட்டில் ரூபாய் நோட்டுகளும், தங்கமும் வைக்கப்பட்டன. தராசு முள் நடுவில் நேராக நின்றதும், நான் இறக்கி விடப்பட்டேன்.  அவ்வாறு கொடுக்கப்பட்ட தங்கத்தின் மதிப்பு 1.9 கோடி ரூபாயாகும். முதன்முதலில் எடைக்கு எடை தங்கம் அளிக்க வேண்டும் என்ற கருத்தை அறிவித்தவர் பொருளாளர் கா.மா.குப்புசாமி ஆவார். அவருக்கு தஞ்சை மாவட்ட திராவிடர் கழகத் தலைவர் ராஜகிரி கோ.தங்கராசு அவர்கள் கேட்டுக்கொள்ள வைரக்கல் பொறித்த தங்க மோதிரத்தை அணிவித்தேன். மாநாட்டில் நிறைவுரையில், “இந்த நிதி எனக்காக அளிக்கப்பட்டதல்ல! தந்தை பெரியாருக்கு நன்றிகாட்ட என் மூலம் அளிக்கப்பட்டுள்ளது. இந்த நிதி மதவாத எதிர்ப்பு இளைஞர்களுக்குப் பயிற்சிப் பட்டறை, 100 புத்தக விற்பனை நிலையம், பல மொழிகளில் தந்தை பெரியாரின் நூல்கள், புதுடில்லியில் நமது இயக்கம் பற்றிய உலகத் தகவல் மய்யம் போன்ற ஆக்கரீதியான பணிகளுக்குப் பயன்படுத்துவோம் என்றேன். நாங்கள் ஏதோ தன்னந்தனியராக இல்லை. உலகக் குடும்பமே எங்களுக்குத் துணையாக இருக்கிறது என்பதைத்தான் இந்த மனிதநேய மாநாடு காட்டியிருக்கிறது’’ எனப் பல கருத்துகளைச் சுட்டிக்காட்டி உரையாற்றினேன். மாநாட்டு மேடையில் நான்கு சுயமரியாதைத் திருமணங்கள் நடைபெற்றன. ஊற்றங்கரை திருவாளர்கள் அப்பாவு _ பச்சியம்மாள் ஆகியோரின் செல்வன் இராசேந்திரன், சின்னக்கண்ணன் _ சந்திரா ஆகியோரின் செல்வி வேல்விழி; கோவில்தேவராயன் பேட்டை திருவாளர்கள் சங்கரலிங்கம் _ சகுந்தலா ஆகியோரின் செல்வன் சந்துரு, வல்லம் பிள்ளையார்பட்டி சிதம்பரநாதன் _ கலைமணி ஆகியோரின் செல்வி அஞ்சுகம்; தஞ்சாவூர் மாவட்டம் சாமிமுத்து _ அந்தோணியம்மாள் ஆகியோரின் செல்வன் லூர்துசாமி, அந்தோணிசாமி _ சவுரியம்மாள் ஆகியோரின் செல்வி தங்கமணி; கோவை மாவட்டம் சுந்தராபுரம் கே.எம்.சண்முகம் _ ருக்மணி ஆகியோரின் செல்வன் கதிரவன், கே.பழனிச்சாமி _ கவுசல்யா ஆகியோரின் செல்வி லாவண்யா ஆகிய நான்கு இணையரையும் வாழ்க்கைத் துணைநல ஒப்பந்த உறுதிமொழியைக் கூறச் செய்து மணவிழாவை நடத்தி வைத்தேன். பூதனூர் திராவிடர் கழகத் தலைவர் இரா.இலக்குமணன் அவர்களின் பேரக் குழந்தையும், கவுதமன் _ சுமதி ஆகியோரின் மகளுமான பெண் குழந்தைக்கு ‘தங்கமணி’ எனப் பெயர் சூட்டினேன். மாநாட்டில் நான் எழுதிய Why I do not believe in God?” என்னும் ஆங்கில நூலை பார்பரா சுமோக்கர் வெளியிட, ஜெர்மானிய நாத்திக அறிஞர் டாக்டர் வால்கர் முல்லா பெற்றுக் கொண்டு _ தமிழ்நாட்டில் உள்ள இதுபோன்ற இயக்கத்தை ஜெர்மனியில் மட்டுமல்ல _ உலகில் வேறு எங்குமே காண முடியாது என்று பெருமையுடன் குறிப்பிட்டார். இந்த மாநாடு தஞ்சையில் அனைத்து தரப்பு மக்களையும் பகுத்தறிவுப் பாதையில் கொண்டுசெல்லும் வகையில், கழகப் பொறுப்பாளர்கள் மற்றும் தோழர்களால் மிகச் சிறப்பாக நடத்தப்பட்டு கழக வரலாற்றில் சிறப்பிடம் பெற்றது. ஜெர்மனி நாத்திகக் குழுவினர் சென்னை பெரியார் திடலுக்கு 6.2.1998 அன்று இரவு ஏழு மணிக்கு வால்கர் முல்லருடன் இணைந்து நாத்திகச் சங்கத்தைச் சார்ந்த பத்து பேருடன் வருகை புரிந்தனர். அவர்களை பகுத்தறிவுக் கழகச் செயலாளர் கோ.அண்ணாவி வரவேற்றார். அப்போது நடைபெற்ற கூட்டத்தில் நிகழ்த்தப்பட்ட மந்திரமா? தந்திரமா? நிகழ்வை ஜெர்மன் குழுவினருக்கு மெருல்கம்தார் ஆங்கிலத்தில் விளக்கிக் கூறினார். இந்த நிகழ்ச்சி அவர்களை மிகுந்த வியப்புக்குள்ளாக்கியது. மலேசிய செல்வம் விழாக்குழு சார்பில் அனைவருக்கும் சால்வை அணிவித்து, நினைவுப் பரிசினை வழங்கிப் பாராட்டினார். ஜெர்மனிய நாத்திகச் சங்க பிரதிநிதி வால்கர் முல்லருக்கு சால்வை அணிவித்து தந்தை பெரியார் உருவம் பொறித்த நினைவுச் சின்னத்தை வழங்கினேன். அந்த நிகழ்வில் உரையாற்றுகையில், “தந்தை பெரியார் அவர்கள் 1932ஆம் ஆண்டு ஜெர்மன் நாட்டுக்குச் சென்றார். இன்று ஜெர்மன் நாட்டைச் சேர்ந்த நாத்திகவாதிகள் தந்தை பெரியார் அவர்களைப் பற்றி அறிந்துகொள்ள இங்கு வந்திருக்-கின்றார்கள். ஜெர்மனி நாட்டைச் சார்ந்த மேக்ஸ் முல்லர் அவர்கள் சமஸ்கிருதத்தைப் பரப்ப இங்கு வந்தார். இன்றைக்கு சிறப்பு விருந்தினராக வந்திருக்கும் வால்கர் முல்லரும் நாத்திகப் பிரதிநிதிகளும் தந்தை பெரியார் அவர்களது கருத்தை ஜெர்மனியில் பரப்ப இங்கு வந்திருக்கின்றனர். காலச் சக்கரம் சுழலுகின்றது! ஜாதி, மதம், கடவுள் ஒருபோதும் மக்களை இவை ஒன்றிணைக்காது. தந்தை பெரியார் அவர்களுடைய கொள்கையான மனிதநேயம் மட்டுமே மனித குலத்தை ஒன்றிணைக்கும்’’ என பல்வேறு கருத்துகளைக் கூறினேன். இந்த நிகழ்வுக்கு கழகத் தோழர்கள், பல்வேறு அமைப்புகளைச் சார்ந்த பொறுப்பாளர்களும் பெருமளவில் கலந்து கொண்டனர். கோவையில் நடைபெற்ற தொடர்குண்டு வெடிப்புத் தொடர்பாக 15.2.1998 அன்று விடுதலையில் கண்டித்தும், இரங்கலைத் தெரிவித்தும் அறிக்கை வெளியிட்டோம். அதில், கோவையில் 14.2.1998 அன்று பற்பல இடங்களில் குண்டுகள் வெடித்தன என்றும், அதனால் சுமார் 30க்கும் மேற்பட்ட உயிர்கள் பலி என்றும், காயம் அடைந்தோர் எண்ணிக்கை 150அய்த் தாண்டும் என்றும் வந்துள்ள செய்தி, எவரையும் அதிர்ச்சிக்கும், ஆறாத் துயரத்துக்கும் உள்ளாக்கும் வேதனையான துயரச் செய்தியாகும். பி.ஜே.பி.யின் முக்கிய தலைவரான அத்வானி அவர்கள் கலந்துகொள்ளவிருந்த தேர்தல் பிரச்சாரக் கூட்டத்தையொட்டி, அவருடைய உயிருக்குக் குறி வைக்கும் அசல் காட்டுமிராண்டிதனமான வெறிச் செயல்தான் இது என்று அறியும் எவரும், இதனை வன்மையாகக் கண்டிக்கவே செய்வர். இதன் பின்னணியில் வெளிநாட்டுப் பயங்கரவாதிகளோ, உள்நாட்டு மதவெறியர்களோ அல்லது வன்முறையை வாழ்வியலாக நம்பும் வன்னெஞ்சர்களோ, எவராக இருந்தாலும் அவர்களைக் கண்டறிந்து, கடும் தண்டனைக்கு ஆளாக்க அரசு தயங்கவே கூடாது. மறைந்தவர்களுக்கு ஆழ்ந்த இரங்கல்!  நிலைமை மற்ற இடங்களில் பரவாது தடுக்கப்படும் தடுப்பு நடவடிக்கைகளை அரசு முடுக்கி விட வேண்டும். காப்பாற்றப்பட வேண்டியது உயிர்கள் மட்டுமல்ல; ஜனநாயகம், பொது அமைதி, சட்டம் _ ஒழுங்குகளும்தாம்’’ என அந்த அறிக்கையில் குறிப்பிட்டிருந்தோம். தருமபுரி மாவட்ட மாணவரணி தலைவர் தீ.சிவாஜி அவர்களின் மணவிழாவை தலைமையேற்று 15.2.1998 அன்று அரூர் காமாட்சியம்மன் திருமண மண்டபத்தில் நடத்தி வைத்தேன். மணமக்கள் தீ.சிவாஜி _ சி.சசிகலா ஆகியோருக்கு வாழ்க்கைத் துணை-நல ஒப்பந்த விழா உறுதிமொழியினை பின்பற்றிக் கூறச் செய்து, மாலை மாற்றிக் கொள்ளச் செய்து மணவிழாவை நடத்தி வைத்து சிறப்புரையாற்றினேன். அந்த உரையில், “சுயமரியாதைக் கொள்கை-களை, தந்தை பெரியார் அவர்களது கொள்கைகளை ஏற்றிருந்தால் இந்த நாட்டிலே மதவெறிப் பாம்பு தலை எடுத்து ஆடுமா? பெரியார் விரும்பிய கருத்துகள் இந்த மண்ணை முழுமையாக ஆண்டிருக்கு மேயானால் மதக் கலவரங்கள் வருமா? கடவுள் இல்லை என்பவன் எங்கேயாவது கோவிலை இடிக்கச் சென்றிருக்கின்றானா? நாங்கள் கடவுள் இல்லை என்று சொல்கின்றனவர்கள்தாம். ஆனால், இந்த நாட்டிலே கடவுளை நம்புவதாகச் சொல்லிக் கொண்டு அன்பே கடவுள் என்று சொல்லிக் கொண்டு வேலாயுதத்தையும், சூலாயுதத்தையும் தூக்கிக் கொண்டு போகின்றார்கள். அதனால், மதவெறி தோன்று-கின்றது. மனித உயிர்கள் பலி கொள்ளப்-படுகின்றன. எங்கெல்லாம் பெரியார் கொள்கை வளருகின்றதோ அங்கு மக்களுக்கு நன்மை ஏற்படும்’’ என நாட்டு நடப்புகளைச் சுட்டிக்காட்டி உரையாற்றினேன். சென்னை பெரியார் திடலில் பகுத்தறிவு திரைப்படமான ‘புரட்சிக்காரன்’ திரைப்படம் தொடக்க விழா 18.2.1998 அன்று முக்கியப் பிரமுகர்களின் வருகையோடு துவக்கப்பட்டது. விழாவில் இயக்குநர் வேலு.பிரபாகரன், திரைப்பட நடிகர் கமல்ஹாசன், பாடலாசிரியர் வைரமுத்து மற்றும் தொழில்நுட்பக் கலைஞர்கள், கழகப் பொறுப்பா£ளர்கள் எனப் பலரும் கலந்துகொண்டனர். அந்த விழாவில் வந்திருந்த அனைவரும் சிறப்புரை-யாற்றினார்கள். அதில் நடிகர் கமல்ஹாசன் உரையாற்றுகையில், “மனித நேயத்தைக் கொள்கையாகவும், நாத்திகத்தைக் கருவியாகவும் கொண்டுள்ள இந்த இயக்கம் தோற்கவே முடியாது. அதில் நான் சேர்ந்திருக்கிறேன். நாடகங்களில் நடிக்க நான் இங்கு வந்திருந்தபோது இங்கு அமர்ந்திருக்கும் அய்யா கி.வீரமணி அவர்கள் தந்தை பெரியார் அய்யா அவர்கள் இருக்கும் இடத்திற்கு அழைத்துச் சென்றார்கள். மற்றவர்கள் சொல்லுவார்கள் _ அந்தப் பெரியார் பேச்செல்லாம் எடுபடாதுங்க, காலம் மாறிப் போய் விட்டது என்று சொல்லும்பொழுது பெரியார் கருத்துகள் எங்கேயும் எந்தக் காலத்திலும் வெற்றி பெறுகின்றது என்பதை யோசித்துப் பார்க்கும்பொழுது அதற்கு நானே முன் உதாரணமாக நிற்கின்றேன்’’ என பல நினைவுகளை எடுத்துக் கூறி உரையாற்றினார். இறுதியாக விழாவில் சிறப்புரையாற்றி நிறைவு செய்தேன். சேலம் மாவட்ட பகுத்தறிவாளர் கழக அமைப்பாளர் _ செயல்வீரர் வீரபாண்டி செல்லப்பன் 21.2.1998 மாரடைப்பால் மறைவுற்றார் என்ற செயதியை அறிந்து வருந்தினோம். சேலம் மாநகரில், மறைந்த சேலம் விசுவும், செல்லப்பனும் இணைந்து ஆற்றிய இயக்கப் பணிகள் சாதாரணமானவையல்ல! சேலத்தில் நடைபெற்ற நீதிக்கட்சி பவள-விழா மாநாட்டில் அவர் ஆற்றிய பணி என்றென்றைக்கும் நெஞ்சில் நிலைத்து நிற்பவை! தாசில்தாராகப் பணியாற்றிக் கொண்டிருந்தார். அவரின் பிரிவால் பெருந்துயரத்துக்கு ஆளாகி இருக்கும் அவரது குடும்பத்தினர்க்கும், இயக்கத் தோழர்களுக்கும் ஆழ்ந்த இரங்கலைத் தெரிவித்துக் கொண்டு, அவரின் துணைவியாருக்கு இரங்கல்செய்தியை அனுப்பி ஆற்றுப் படுத்தினோம்.ஸீ (நினைவுகள் நீளும்...)செய்திகளை பகிர்ந்து கொள்ள

பெரியார் பேசுகிறார் : தமிழர் திருநாள்

 தந்தை பெரியார் பொங்கல் பண்டிகை என்பது நாள், நட்சத்திரம், மதக்கதை, ஆதாரம் முதலியவை எதுவுமே இல்லாமல் தை மாதம் ஒன்றாம் தேதி என்பதாக தை மாதத்தையும், முதல் தேதியையும் ஆதாரமாகக் கொண்டதாகும். இதற்கு எந்தவிதமான கதையும் கிடையாது. இந்தப் பண்டிகை, உலகில் எந்தப் பாகத்திற்கும் எந்த மக்களுக்கும் உரிமையுள்ள பண்டிகையாகும். என்றாலும் மற்ற இடங்களில் மற்ற மக்களால் பல மாதங்களில் பல தேதிகளில் பல பேர்களால் கொண்டாடப்படுவதாகும். இக்கொண்டாட்டத்தின் தத்துவம் என்னவென்றால், விவசாயத்தையும் வேளாண்மையையும் அடிப்படையாகக் கொண்டு அறுவடைப் பண்டிகையென்று சொல்லப் படுவதாகும். ஆங்கிலத்தில் ஹார்வெஸ்ட் ஃபெஸ்டிவல் (Harvest Festival) என்று சொல்லப்படுவதன் கருத்தும் இதுதான். என்றாலும், பார்ப்பனர் இதை மத சம்பந்தம் ஆக்குவதற்காக விவசாயம், வேளாண்மை, அறுவடை ஆகிய கருத்தையே அடிப்படையாகக் கொண்டு இதற்கு இந்திரன் பண்டிகை என்றும் அதற்குக் காரணம் வெள்ளாண்மைக்கு முக்கிய ஆதாரமான நீரை (மழையை)ப் பொழிகிறவன் இந்திரன் ஆதலால் இந்திரனைக் குறிப்பாய் வைத்து விவசாயத்தில் விளைந்து வெள்ளாண்மையாகியதைப் பொங்கி (சமைத்து) மழைக் கடவுளாகிய இந்திரனுக்கு வைத்துப் படைத்துப் பூசிப்பது என்றும் கதை கட்டிவிட்டார்கள். இந்தக் கதையை இவ்வளவோடு விட்டுவிடவில்லை. இம்மாதிரியான இந்திர விழாபற்றி, கிருஷ்ணன் பொறாமைப்பட்டுத் தனக்கும் அந்த விழாவை (பூசையை) நடத்த வேண்டுமென்று மக்களுக்குக் கட்டளை இட்டதாகவும், மக்கள் அதன்படி செய்ததாகவும், இந்த இந்திரவிழா கிருஷ்ணமூர்த்தி விழாவாக மாறியது கண்ட இந்திரன் கோபித்து ஆத்திரப்பட்டு, இந்தக் கிருஷ்ணமூர்த்தி விழா ஈடேறாமல் - நடைபெறாமல் போகும் பொருட்டு பெரிய மழையை உண்டாக்கி விழாக் கொண்டாடுவோர் வெள்ளாண்மைக்கு ஆதரவாக இருந்த கால்நடைகள், ஆடு, மாடுகள் அழியும் வண்ணமாகப் பெரும் மழையாகப் பெய்யச் செய்துவிட்டான் என்றும், இதற்கு ஆளான மக்கள் கிருஷ்ணமூர்த்தியிடம் சென்று முறையிட்டதாகவும், கிருஷ்ணன் மக்களையும் ஆடு, மாடுகளையும் காக்க ஒரு பெரிய மலை (கோவர்த்தனகிரி)யைத் தூக்கி அதைத் தன் சுண்டு விரலால் தாங்கிப் பிடித்துக் காத்ததாகவும், இதனால் இந்திரன் வெட்கமடைந்து கிருஷ்ணனிடம் தஞ்சமடைந்து தனது மரியாதையைக் காப்பாற்ற வேண்டுமென்று கேட்டுக் கொண்டதாகவும், அதற்கிரங்கி, கிருஷ்ணன், எனக்கு ஒருநாள் பண்டிகை, உனக்கு ஒருநாள் பண்டிகையாக, மக்கள் முதல் நாள் எனக்காக பொங்கல் பண்டிகையாகவும் அதற்கு மறுநாள் உனக்காக மாட்டுப் பொங்கல் என்று கொண்டாடும்படியும் ராஜி செய்து கொண்டார்கள் என்றும் சிரிப்பிற்கிடமான - ஆபாச முட்டாள்தனமான கதைகளைக் கட்டிப் பொருத்திவிட்டார்கள். இதிலிருந்து தேவர்களுக்கு அரசனான, இந்திரனின் யோக்யதை எப்படிப்பட்டது? மக்களுக்குக் கடவுளான கிருஷ்ணனின் யோக்கியதை எப்படிப்பட்டது என்பதை மக்கள் சிந்தித்து உணரவேண்டுமென்று கேட்டுக் கொள்கிறேன். மற்றும், இதில் பொங்கலுக்கு முதல் நாளைக்கு ஒரு கதையையும், மறுநாளுக்கு ஒரு கதையையும் போகிப் பண்டிகை என்றும், சங்கராந்திப் பண்டிகையென்றும் பெயர் வைத்து மூன்று நாள் பண்டிகையாக்கி, அதில் ஏராளமான முட்டாள்தனத்தையும் மூடநம்பிக்கையையும் புகுத்தி விட்டார்கள். நமது பார்ப்பனர்களுக்கு எந்தக் காரியம் எப்படியிருந்தாலும், யார் எக்கேடுகெட்டாலும் தாங்கள் மனித சமுதாயத்தில் உயர்ந்த பிறவி மக்களாகவும், உடலுழைப்பு இல்லாமல் வாழும் சுக ஜீவிகளாகவும் இருக்க வேண்டும் என்பதற்காக மனித சமுதாயம் முழுவதுமே அறிவைப் பயன்படுத்தாத, ஆராய்ச்சியைப் பற்றியே சிந்திக்காத முட்டாள்களாகவும், காட்டுமிராண்டிகளாகவும் இருக்கச் செய்ய வேண்டும் என்பதே அவர்களுடைய பிறவிப் புத்தியானதால் அதற்கேற்ப உலக நடப்பைத் திருப்பிப் பாதுகாத்து வைக்கிறார்கள். பார்ப்பனர்களின் இம்மாதிரியான அட்டூழிய அக்கிரம காரியங்களில் இருந்து விடுபட்டு மனிதர்களாக நாம் வாழவேண்டுமானால் பொங்கல் பண்டிகை என்கின்றதை முதல் நாள் அன்று மட்டும் நல்ல உயர்வான உணவு அருந்துவதையும் நல்லுடை உடுத்துவதையும் மனைவி மக்கள் முதலியவர்களுடன் இன்பமாகக் காலம் கழிப்பதையும் கொண்டு, நம்மால் கூடிய அளவு மற்றவர்களுக்கும் உதவி அவர்களுடன் குலாவுவதான காரியங்களையும் செய்வதன்மூலம் விழாக் கொண்டாட வேண்டியது அவசியம். மற்றபடியாக, மதச்சார்பாக உண்டாக்கப்பட்டிருக்கும் பண்டிகைகள் அனைத்தும் பெரிதும் நம் இழிவிற்கும் பார்ப்பனர் உயர்விற்கும், நம் மடமைக்கும், காட்டுமிராண்டித் தன்மைக்கும் பயன்படத் தக்கதாகவே இருந்து வருவதால் - பயனளித்து வருவதால் அறிவுள்ள, மானமுள்ள மக்கள் மத சம்பந்தமான எந்தப் பண்டிகையையும் கொண்டாடாமலிருந்து, தங்களை மானமும் அறிவுமுள்ள மக்களாக ஆக்கிக் கொள்ள வேண்டுமென்று கேட்டுக் கொள்கிறேன். “மானமும் அறிவும் மனிதர்க்கழகு.’’ - ‘விடுதலை’ - 13.1.1970செய்திகளை பகிர்ந்து கொள்ள

சிறுகதை : "எமரால்ட் எம்.டி. கோபாலகிருஷ்ணன் நினைவு" சிறுகதைப் போட்டி 2020

"புதிய பாதை" கண்மணிராசா தெருவில் நுழைந்ததுமே, மரங்களோடு கூடிய அந்த வீடு கண்ணில் பட்டது. பார்க்கவந்த வீடு அந்த வீடாக இருந்தால் நல்லது என நினைத்து .... வண்டியின் பின்புறமிருந்த பையனிடம் கேட்டேன். "எந்த வீடுப்பா?" "அந்தா கொய்யா மரம் நிக்குதே... அந்த வீடுதாண்ணே ..." மகிழ்ச்சியில் மனம் துள்ளியது. மரம் வைத்த வீடென்றால் ஜோதிக்கு ரொம்ப பிடிக்கும். மரம் மட்டுமல்ல... பறவைகள் வந்து அடைய வேண்டும். அணில்கள் நிறைய இருக்க வேண்டும். மத்தியானப் பொழுதுகளில் மரத்தின் கீழ் கட்டில் போட்டுத் தூங்க வேண்டும். இப்படி நிறைய ஆசைகள் அவளுக்கு. இப்பதான் என்றில்லை. காதலிக்கும் போதே அப்படித்தான். ரசனையான பெண், கவிதை பிடிக்கும்; பாட்டு பிடிக்கும்... பாடுவேன் என்பதால் தானே என்னையே பிடித்தது அவளுக்கு. அப்போதே இந்தக் கனவுகளைக் கண்களில் காதல் பொங்க கைகளை இறுகப் பற்றிக்கொண்டே விவரிப்பாள். ஜாதி மீறிய காதலென்பதால் வீட்டை எதிர்த்து திருமணம். நண்பர்கள்தான் இதுவரை துணை. மணமான இந்த எட்டு ஆண்டுகளில் அவள் விரும்பியபடி வீடு அமைந்ததில்லை. ஆறு வீடுகள் மாறியிருக்கிறார்கள். இது ஏழாவது வீடு. வீடு மாறும் ஒவ்வொரு முறையும் ஜோதி ஆசைப்படுவாள். மரம் வைத்த ... பெரிய முற்றம் வைத்த ..... தனி வீடு. நண்பர்கள் வந்து கூடி பேச.... விசாலமான வீடு வேண்டுமென. அப்படியான வீடு கிடைத்ததில்லை . வரப்பெற்றதெல்லாம் புறாக் கூண்டுகளே. "சார்... வாங்க..." வாயிற் கதவைத் திறந்த படியே பையன் கூப்பிட்டான். கதவைத் திறந்ததுமே பெரிய முற்றம் கண்ணில் விரிந்தது. வெகு நாள்களாக யாரும் வரவில்லை போல்... இலைகள் நிறைந்து தரையை மூடியிருந்தன. கொய்யாக் கனிகள் யாரும் பறிக்காததால் பழுத்துக் கிடந்தன... அணில்கள் தலையைத் திருப்பி இவர்களைக் கவனித்தன... பறவைகளின் குரல் சலசலத்தன... பக்கத்து வீட்டுக் கதவு திறக்கும் சத்தம் கேட்டது. கதவின் பின்னிருந்து நீண்ட முகத்தைக் கண்டதும் சற்று பயந்துதான் போனேன். வெறித்த பார்வையுடன் அடர்ந்த தாடியுடன் பெரியவர் இவனை ஊடுருவினார். அவரைக் கண்டதும் பையன் பதறினான். "சார், இந்த வீடு உங்களுக்கு வேணாம் சார், இந்த வீட்டுல பேய் இருக்கு சார்." "என்னடா சொல்றா...?" "இப்ப நம்மள முறைச்சபடி பார்த்தாரே பெரியவரு... அவரு பொண்ணு திடீர்னு ஒருநா அவங்க வீட்டுல தூக்கு மாட்டி செத்துப்போச்சு. அதுக்கப்புறம் தினமும் ராத்திரி அந்த வீட்டுல இருந்து ஏதேதோ சத்தம் கேக்கவும்... பயந்து போய் இந்த வீட்டுல இருந்தவங்க பயந்து போய் காலி பண்ணினாங்க... அதுக்கப்பறம் யாருமே குடிவரல...." எனக்குள் லேசாய் எழுந்த பயத்தை மறைத்தபடி கேட்டேன், "சரிடா, பெரியவரு ஏன் நம்மள முறைக்கணும்...." "மக செத்ததுல இருந்து அவரு தனியாகிட்டாரு . யார்கிட்டயும் பேசறதில்ல சார். யாரைப் பாத்தாலும் இப்படித்தான் முறைப்பாரு..... வெளிய வருவதில்ல... பென்சன் பணத்துல வாழ்க்கைய ஓட்டுறாரு.. மாசம் ஒரு நாள், ஆட்டோவுல போவாரு அவ்வளவுதான்.... வாரம் வாரம் அந்த ஆட்டோக்காரரு, காய்கறிகள் வாங்கி வருவாரு.... அவரு கூட வீட்டுக்குள்ள போக மாட்டாரு. வெளிய வராண்டாவோட சரி..." பையன் சொல்லி முடிக்கும் முன் முழுதாய் வேர்த்திருந்தான். "பரவாயில்ல மாமா முடிச்சிருங்க" அப்படியானால் அந்த வீட்டை ரொம்ப விரும்பத் தொடங்கிவிட்டாளென அர்த்தம். அவள் கண்களுக்குள் அந்த வீட்டின் மரநிழலில் அமர்ந்தபடியே தேநீர் குடித்தபடி நாங்கள் பேசிக் களிக்கும் காட்சி விரிந்தது..... நானும் அவளின் கைகளை இறுகப் பற்றிக் கொண்டேன். முதலாளிக்கு மிகுந்த சந்தோசம். நான் சரி என்றதும் "நிசமா.. நிசமா..." என கேட்டுக் கொண்டார். சடசடவென வேலைகள் நடந்தன. வீடு காட்ட வந்த பையன் முகத்தில் சற்று கலக்கம். ஜோதிக்கு இன்னும் பயம் விலகவில்லை என்பது அவளின் கண்களில் தெரிந்தது. இரவு மெல்ல மெல்லத் தொடங்கிய மழை வலுத்தது..... என் கவிதையொன்றை ஜோதி பாடத் தொடங்கினாள். கூடவே, பெரியவன் பாட... நானும் மகளும் ஆட.... என கலகலத்தது வீடு. ஆடிய களைப்பில் பிள்ளைகள் உறங்கத் தொடங்க..... மழை தூறலாய்க் குறைந்திருந்தது. இப்போது லேசாய் துவங்கியது...... அந்தக் கதவு திறந்து மூடும் சத்தம்... லேசாய் பெண்குரல் பாடும் சத்தம்.... தொடர்ந்து, திடீரென பெரியவரின் பலத்த அழுகுரல் சத்தம். நான் பதறி குழந்தைகளின் காதுகளை மூடுமாறு போர்வையை இழுத்து விட்டு, ஜோதியைப் பார்த்தேன்... மிகுந்த பயத்தோடு நடுங்குவது தெரிந்தது. எனக்குள்ளும் இருந்த பயத்தை மறைத்துக் கொண்டு, ஜோதியின் கைகளை ஆறுதலாய் இறுகப் பற்றினேன்.. கொஞ்ச நேரத்தில் பெரியவரின் அழுகுரல் நின்றது; பெண் குரலின் பாடலும் நின்றது... ஆனால் யாரோ நடந்து நடந்து கதவைத் திறந்து மூடும் சத்தம் மட்டும் ஓயவேயில்லை . "மாமா, அந்தப் பொண்ணு செல்போன்ல பாட்டு கேட்டுக்கிட்டே... நைட்டு ரொம்ப நேரம் வீட்டுக்குள்ளயே நடக்குமாம். அதான் செத்ததுக்கு அப்புறமும் தினமும் இங்க வந்து நடக்குதாம். அவ வரக்கூடாதுன்னு பெரியவரு கதவை அடைப்பாராம். அந்தப் பேய் திறக்குமாம்.... விடிய விடிய இதுதான் நடக்குமாம்.. பயமாருக்கு மாமா..." "யாரு சொன்னா...?" "காலையில் செல்விய வரச்சொல்லிட்டு பால் வாங்க தெரு முக்குல இருக்கற கடைக்குப் போனேன், அங்க ஒரு அக்கா என்னய விசாரிச்சுட்டு இதை சொன்னாங்க..." எனக்குள் பயம் கூடியது... விடியும் வரை, பேய் கதவை திறக்க... அவர் மூட... என சத்தம் கேட்டபடியே இருந்தது. விடிந்ததும் ஒரு முடிவெடுத்தேன். விடுப்பென ஆலைக்குத் தகவல் தெரிவித்து விட்டு எங்கும் போகாமல் வீட்டில் இருந்தேன். குழந்தைகள் பள்ளிக்குப் போனபின்பு யோசித்தபடியே அந்தப் பெரியவருக்காய்க் காத்திருந்தேன். "வணக்கம் அய்யா.... டீ குடிக்க வாங்களேன்..." அவர் திடுக்கிட்டார். தன் பின்னால் யாரோ இருப்பதாக நினைத்து திரும்பி பார்த்துக் கொண்டு... அவரைத்தான் அழைத்தேனெனப் புரிந்து கொண்டார். "என்னையா தம்பி" ஆமாங்கய்யா, வாங்க..... கொஞ்ச நேரம் பார்த்தபடியே இருந்தார்... பின் தயங்கியபடி அவர் வீட்டிலிருந்து எங்கள் வீட்டுக்கு வந்தார். மரத்தடியில் நாற்காலி போட்டபடி அமர்ந்திருந்த நானும் ஜோதியும் அவரை எழுந்து வரவேற்றோம்.... அவர் கண்களில் வியப்பும் மகிழ்வும் மின்னின. தேநீரைக் கொடுத்தபடி நாங்கள் அறிமுகமானோம். மவுனமாக தேநீரைக் குடித்தவர், தயங்கி... தயங்கிப் பேசத் தொடங்கினார்.... "ரெண்டு வருசமாச்சு தம்பி, ஆளுக்கிட்ட பேசி.... யாரும் பேசறதில்ல உங்களுக்கு எப்படித் தோனுச்சு எங்கிட்ட பேசலாம்னு. நான் பேசும் முன் ஜோதி ஆரம்பித்தாள். அவர் பேசத் தொடங்கியதும் அவளுக்குப் பயம் விட்டிருக்கும் போல. "இல்லங்கய்யா.... நீங்க பாக்கறதுக்கு என் அப்பா போலவே இருந்தீங்க... அதான் மாமாகிட்ட சொன்னேன்.... உங்ககிட்ட பேசத் தோனுச்சு." அவர் கண்கள் கலங்குவது தெரிந்தது. "சந்தோசம்மா சந்தோசம்.... ரொம்ப நாள் கழிச்சு மனசு நிறைவா இருக்கு. என் பொண்ணு உயிரோடு இருந்தாலும் இப்படித்தான் இருந்திருப்பா.... நீ நல்லாருப்பமா... ஒரு குறையும் வராது...." கேட்டு விட வேண்டியதுதான் எனத் தொடங்கினேன். "அய்யா.... உங்க பொண்ணு... எப்படி...?" சற்று மவுனமானவர், பின் கண்களைத் துடைத்துக் கொண்டு பேசலானார். "தம்பி, என் பொண்ணு பேரு மாதவி. நானொரு தமிழாசிரியர். என் மனைவி சீக்கிரமாகவே இறந்துட்டா... அப்ப என் பொண்ணுக்கு 18 வயசு..... அப்பயிருந்து நானும், என் பொண்ணும் தனியாத்தான் வாழத் தொடங்குனோம்." உறவுக்காரங்க...? "அது, தனிக் கதை தம்பி. நானும் என் மனைவியும் காதல் திருமணம் _ வேற வேற ஜாதி... அதுனால உறவுகள் அண்டறதில்ல.." ஜோதி அழுதுவிடுவாள் போலத் தோன்றியது. "இன்னொரு டீ வேணும் தாயி...!" அவரே, கேட்கவும் உள்ளே போனாள். "உறவுகளை விட்டு இந்த ஊருக்குப் பணி மாற்றம் கேட்டு வந்து ஓய்வு பெற்றதும் வந்த பணத்துல இந்த வீட்டை வாங்கி இங்கவே தங்கிட்டோம். நல்லாதான் போய்கிட்டு இருந்தது வாழ்க்கை." ஜோதி மூன்று பேருக்குமே தேநீரோடு வந்தாள். "எம் பொண்ணுக்கு, இசைன்னா உயிர். நல்லா கவிதை எழுதுவா, பாடுவா..... இங்க வந்து கல்லூரில் படிச்சுக்கிட்டிருந்தா.... வெளியூர்க் கல்லூரியில் இடம் கிடைச்சதால் விடுதியில் தங்கி படிப்பைத் தொடர்ந்தா...... நிறைய தேர்வுகளில் முதலிடம் பிடிச்சா... அதான் அவளுக்கு வினையாச்சு....... எங்க ஜாதியைச் சொல்லிச் சொல்லி அவள் கேலியும் கிண்டலும் பண்ணியிருக்காங்க. தைரியமான பொண்ணுதான்... தொந்தரவு அதிகமாகவும் திடீர்னு ....." மேலே சொல்லமுடியாமல் அழத் தொடங்கினார். உறைந்து போய் கேட்டுக் கொண்டிருந்த நான் எழுந்து அவரின் கைகளை ஆறுதலாகப் பிடித்தேன். "உங்ககிட்ட கூட சொல்லலயாப்பா மாதவி....." "இல்லம்மா. ஏற்கனவே என் மனைவி இறந்த சோகம். சொந்த ஊரைப் பிரிந்த துயரம்.. இதால நான் சங்கடப்படுறன்னு அவளுக்கு தோணிருக்கு ..... இதை வேற சொல்லணுமான்னு..." நீங்க ஏன் போலிஸ்ல புகாரளிக்கல... "கொடுத்துருக்கேன், தம்பி. பேப்பர்ல நீங்க பாத்திருப்பீங்கல்ல... அதுல என் பொண்ணு பேரை மாத்திப் போட்டுருப்பாங்க...." அவர் சொல்லச் சொல்ல எனக்கு நினைவு வந்தது. இரண்டு ஆண்டுகளுக்கு முன் ஜாதியைச் சொல்லி கேலி செய்ததால் தற்கொலை செய்து கொண்ட மாணவி என மாநிலம் பரபரப்பானது. அத்துயரை இவ்வளவு பக்கத்தில் பார்ப்பேனென நினைக்கவில்லை. மவுனமாய் இருந்து விட்டு..... "அய்யா, ஒன்னு கேட்கறேன், தப்பா நினைக்க மாட்டீங்கள்ள..." "கேளுங்க தம்பி, யாருமே எதுவுமே கேட்காம..... பேசாம கிறுக்குப் புடிச்சுப் போயிருக்கேன்... யாராவது பேச மாட்டாங்களானு ஆதங்கத்தோட பாக்கறன். தப்பா புரிஞ்சுக்கிட்டு பயப்படுறாங்க.... கேளுங்க.." "இல்ல.... வந்து..... இப்பவும் உங்க பொண்ணு ராத்திரில வர்றதாவும் நடக்கறதாவும்..... "ஆமா, அது வேற சொல்றாங்களாம். ஆட்டோ டிரைவர் ஒருநாள் சொன்னார். அதுக்குப் பயந்துக்கிட்டு இந்த வீட்டுக்குக் கூட ஆளுக குடி வரலயாம் எல்லாம் தெரியும் தம்பி... யாராவது கேட்டாத்தானே நான் உண்மையச் சொல்ல முடியும்." "அப்படின்னா தினமும் ராத்திரி உங்க வீட்டுல கேட்கற சத்தம்...." என்ன சத்தம்...? "விடிய விடிய கதவை உங்க பொண்ணும் நீங்களும் திறந்து மூடுற சத்தம்... பெண் குரல் பாடுற சத்தம்.... மெல்ல புன்னகைக்கத் தொடங்கியவர்... பலத்து சிரிக்கத் தொடங்கினார். பின் எழுந்து.. ரெண்டு பேரும் என் கூட என் வீட்டுக்கு வாங்க..... என நடக்கத் தொடங்கினார். என்னதான் ஆகுதென பார்த்து விடலாமென நானும்..... என் கைகளைப் பற்றியபடி ஜோதியும் அவரின் வீட்டுக்குள் நுழைந்தோம். அவ்வளவு சுத்தமாக நேர்த்தியாக வீடிருந்தது. நிறைய இசைத்தட்டுகள். தமிழிலக்கிய நூல்கள்... நிறைந்திருந்தன. ஆச்சரியத்தில் மூழ்கிப் போயிருந்த எங்களை ஒரு கதவின் அருகே நிறுத்தி விட்டு.... ஒரு எண்ணெய்ப் பாட்டிலோடு வந்தவர் அந்தக் கதவின் கொண்டி... இரும்புக் கம்பிகளில் எண்ணையை விட்டார். "இனி சத்தம் கேட்காது... என சிரித்தார்." நாங்கள் புரியாமல் பார்க்க, "தம்பி, இந்தக் கதவு மூட முடியாதபடி சேதமாயிருச்சு.... ஆசாரி யாரும் வர மறுக்குறாங்க..... நானும் விட்டுட்டேன். காத்துல கதவு ஆடி ஆடி... அந்த சத்தம்.... போதுமா...." "அப்படின்னா அந்தப் பாடல் ...... அதுவா என் பொண்ணுதான்," என்றபடி, செல்பேசியொன்றை ஆன் செய்தார். பிசிறில்லாத, குரலில் மாதவி பாடுவது ஒலித்தது. "அப்பப்ப இதைக் கேட்பேன். நேத்து சோகம் தாங்காம அழுதுகிட்டே.... மன்னிக்கணும் என்றார்." நாங்கள் திகைத்து நின்றிருந்தோம். இரண்டு நாள்கள் கழித்து... எங்கள் வீட்டு மரத்தடியில் குழுமியிருந்த நண்பர்களிடையே செல்வி பேசிக்கொண்டிருந்தார். "நண்பர்களே, மத ... ஜாதிய... வர்க்க ஏற்றத் தாழ்வுகளை நீக்க எழுத்தின் வழியே போராடும் நம் மன்றத்தில், புதிதாக நமக்கெல்லாம் தந்தையாக தமிழாசிரியர் நல்லபெருமாள் இணைந்திருக்கிறார்." "உறவுகள் என்பது ரத்த உறவுகள் மட்டுமல்ல சக மனிதர்களை நேசிக்கிற யாவருமே உறவுகள்தான். அந்த வகையில், நம் ஜோதியின் தந்தையை அதாவது நல்லபெருமாள் அய்யாவை நாமும் தந்தையாக உணர்கிறோம். அது மட்டுமல்ல.... மறைந்த நம் சகோதரி மாதவி அவர்களின் மரணத்திற்கு நியாயம் கிடைக்கும் வரை நாம் போராடுவோம். இத்தருணத்தில் இன்னொரு மகிழ்வான தகவலையும் தெரிவிக்கிறேன். நம் தந்தை நல்லபெருமாள் அவர்களின் வேண்டுகோளின்படி அவரது நிதியுதவியில் "மாதவி விருது" ஏற்படுத்தவுள்ளோம். சமூகப் போராளிகளில் ஒருவரைத் தேர்ந்தெடுத்து ஆண்டுதோறும் மாதவி விருதை வழங்குவோம்." செல்வி முடிக்க.... நல்லபெருமாள் அப்பாவை பேச நண்பர்கள் வேண்டினர். அப்பா எழுந்து ... "நம்ம கூட்டத்துல யாராவது மரவேலை செய்ற ஆசாரி இருக்கீங்களா...." என்க .... கூட்டம் வெடித்துச் சிரித்தது. நானும் ஜோதியும் வெட்கத்தில் முழிக்க.... அந்தக் கதவு, பேய்க் கதைய எல்லாருக்கும் சொல்லிட்டேன், என் அப்பாவும் சிரிப்பில் நிறைந்தார்.ஸீசெய்திகளை பகிர்ந்து கொள்ள

முகப்புக் கட்டுரை : பண்பாட்டுப் படையெடுப்பைத் தகர்க்கும் திராவிடர் திருநாளும்! தமிழ்ப் புத்தாண்டும்!

மஞ்சை வசந்தன் இந்து மத சாஸ்திரப்படியும் தை முதல் நாளே புத்தாண்டு! ஆண்டின் தொடக்கம் தை முதல் நாள் என்ற தமிழரின் கணக்கீட்டை இந்து மத சாஸ்திரமே ஏற்கிறது. நாரதருக்கும் கிருஷ்ணருக்கும் பிறந்தவை 60 வருடங்கள் என்பதும் இதன் மூலம் தகர்க்கப்படுகிறது. நாரதரும் கிருஷ்ணனும் சேர்ந்து (புணர்ந்து) 60 பிள்ளைகளைப் பெற்றனர். “பிரபவ’’ தொடங்கி 60 ஆண்டுகள்தான் அந்தப் பிள்ளைகள் என்று அறிவுக்கும், நடைமுறைக்கும் ஒவ்வாத ஒரு புராணக் கதையைப் புனைந்து, ஆணும் ஆணும் பெற்ற 60 பிள்ளைகளே 60 தமிழ் வருடங்கள் என்றனர் ஆரியப் பார்ப்பனர்கள். பிரபவ தொடங்கி 60 ஆண்டுகளும் சமஸ்கிருதப் பெயர் கொண்டவை. சமஸ்கிருத ஆண்டு எப்படி தமிழாண்டாகும்? ஆக, தமிழர் சிறப்பைக் கெடுக்க வந்த, மறைக்க வந்த அப்பட்டமான மோசடி கதை இது என்பதும் உறுதியாகிறது. இந்து மத சாஸ்திரமான மனுதர்மமே இதை எற்கவில்லை. அதை கீழே காண்போம்: உண்மையில் தமிழ்ப் புத்தாண்டு எது? தமிழர்களின் காலக் கணக்கீடு அனைத்தும் இயற்கை நிகழ்வுகளை ஒட்டி, அறிவுபூர்வமாகச் செய்யப்பட்டவை என்பதையும், அதை இந்து மத சாஸ்திரமே ஏற்கிறது என்பதையும் கீழே அறியலாம். ஒரு நாள் என்பது என்ன? சூரியன் தோன்றி மீண்டும் சூரியன் தோன்றுவதற்கு ஆகும் காலம். ஒருமாதம் என்பது என்ன? ஒரு முழு நிலவு தோன்றி மீண்டும் ஒரு முழு நிலவு தோன்ற ஆகும் காலம். நிலவை வைத்து மாதம் கணக்கிடப்பட்டதால் மாதத்திற்குத் திங்கள் என்ற பெயர் வந்தது. நிலவுக்குத் திங்கள் என்று வேறு பெயர் உண்டு என்பதால். அதேபோல் ஆண்டு என்பது என்ன? சூரியன் தென் கோடியில் தோன்றி மீண்டும் தென் கோடியில் தோன்றும் வரையிலான காலம் ஓராண்டு. அதாவது, சூரியன் தை மாதத் தொடக்கத்தில் வடக்கு நோக்கி நகரத் தொடங்கும். சித்திரையில் தலைஉச்சியில் இருக்கும். பின் ஆடியில் வடகோடியில் இருந்து தென்கோடி நோக்கும். பின் மார்கழி இறுதியில் தென்கோடிக்கு வந்து மீண்டும் வடக்கு நோக்கி நகரும். இவ்வாறு சூரியன் வடக்கு நோக்கி நகரத் தொடங்கியதிலிருந்து மீண்டும் வடக்கு நோக்கி நகரத் தொடங்கும் வரையிலான கால அளவு ஓர் ஆண்டு. சூரியன் நகர்வதில்லை என்பது அறிவியல் உண்மை. ஆனால் நம் பார்வைக்கு நகர்வதாகத் தெரிவதை வைத்து அவ்வாறு ஆண்டு கணித்தனர். தை முதல் நாள் அன்றுதான் சூரியன் வடதிசை நோக்கி (உத்ராயணம் நோக்கி) நகரத் தொடங்கும். எனவே தை முதல் நாள் ஆண்டின் தொடக்க நாளாகக் கொள்ளப்பட்டது. சித்திரையில் சூரியன் தலை உச்சியில் இருக்கும். ஒரு கோடியிலிருந்துதான் கணக்குத் தொடங்குவார்களே தவிர, தலை உச்சியிலிருந்து கணக்குத் தொடங்க மாட்டார்கள். எனவே, சித்திரையில் ஆண்டுத் தொடக்கம் என்பது தப்பு. எனவே, தை மாதம் முதல் நாள் தமிழ்ப் புத்தாண்டு தொடக்கம் என்பதே சரி. ஆரியர்கள் உள்பட எந்தவொரு இனமும் இவ்வுலகில் மொழி, நாகரிகம், பண்பாடு, கலை, வணிகம், கட்டுமானம், வானியல், கணிதம், இசை என்று எதையும் அறிந்திராத நிலையில் அனைத்திலும் உயர்ந்து நின்ற இனம் தமிழினம். அதை அய்யத்திற்கு இடமின்றி உறுதி செய்ய முடியும். உறுதியும் செய்யப்பட்டுள்ளது. அப்படி காலக் கணக்கீட்டிலும் உலகில் முன்னோடி தமிழர்களே இந்தியாவிற்குள் நுழைந்த ஆரியர்கள் மொழி உள்பட எல்லாவற்றையும் தமிழர்களிடமிருந்தே பெற்றனர். அவர்களுக்கென்று எதுவும் இல்லை. எல்லாமும் தமிழரிடம் பெறப்பட்டவையே. நாம் மேலே விளக்கியபடி சூரியன், நிலவை வைத்து தமிழர்கள் செய்த காலக் கணக்கீட்டை அவர்களும் ஏற்று அவர்களின் முதன்மைச் சாஸ்திரமான மனுதர்ம சாஸ்திரத்தில் எழுதிக் கொண்டனர். மனுதர்மம் முதல் அத்தியாயத்தில் 65 முதல் 67 வரையிலான ஸ்லோகங்களில் இதைக் காணலாம். சுலோகம் 65 நாள் பற்றியும், சுலோகம் 66 மாதம் பற்றியும் சுலோகம் 67 ஆண்டு பற்றியும் கூறுகிறது. சுலோகம் 65: பகல் இரவு சேர்ந்தது நாள். அதாவது காலை முதல் இரவு விடியும் வரை ஒரு நாள் என்கிறது மனுஸ்மிருதி. தமிழர்கள் கூறிய சூரிய தோற்றம் முதல் இரவு விடியும் வரை ஒரு நாள் என்பதை மனுஸ்மிருதி ஏற்கிறது. சுலோகம் 66: முழு நிலவு (பவுர்ணமி) தொடங்கி அமாவாசை வரை 15 நாள்கள் (கிருஷ்ண பட்சம்) அதன் பின் முழு நிலவு வரை 15 நாள்கள் (சுக்கில பட்சம்) இரண்டும் சேர்ந்து 30 நாள் ஒரு மாதம் என்கிறது மனுஸ்மிருதி. தமிழர்கள் கூறிய ஒரு முழு நிலவு தொடங்கி மீண்டும் முழு நிலவு வரும் வரை ஒரு மாதம் என்பதை மனுஸ்மிருதி ஏற்கிறது. சுலோகம் 67: தை மாதம் முதல் ஆனி மாதம் வரை ஆறு மாதம் உத்ராயணம். ஆடி மாதம் முதல் மார்கழி மாதம் வரை ஆறு மாதம் தட்சணாயனம். உத்ராயணம் தொடங்கி தட்சணாயணம் முடிய ஓராண்டு. சூரியன் வடக்கு நோக்கல் தொடங்கி வடக்கே சென்று மீண்டும் தெற்கு நோக்கி நகர்ந்து தெற்கை அடையும் வரையிலான காலம் ஓராண்டு என்ற தமிழர் ஆண்டுக் கணக்கை மனுஸ்மிருதி ஏற்கிறது. இதில் முக்கியமான கருத்து - ஆண்டு தொடக்கம் தை மாதம் என்பதை மனுதர்மம் 67ஆவது ஸ்லோகம் ஏற்கிறது என்பதே. எனவே, தை முதல் நாளே ஆண்டின் தொடக்கம் என்பது தமிழர் மரபுப்படியும், மனுதர்ம சாஸ்திரப்படியும் உறுதியாகிறது. எனவே, தை முதல் நாளை தமிழ்ப் புத்தாண்டாகக் கொண்டாடுவோம். அதுவே தமிழர்க்கும், அவர்தம் மரபுக்கும் சரியானது. தை முதல் நாளை தமிழ்ப் புத்தாண்டாக கொண்டாடுவதன் மூலம், சமஸ்கிருத வருடத்தைத் திணித்த ஆரியப் பண்பாட்டுப் படையெடுப்பைத் தகர்க்க முடியும். மழைத் திருநாள் போகிப் பண்டிகை ஆக்கப்பட்டது தமிழர்களிடம் கடவுள் நம்பிக்கை தொன்மைக் காலத்தில் இல்லை. அவர்கள் தங்களுக்குப் பயன்படுகின்றவற்றை, தங்களுக்கு நன்மையும், பாதுகாப்பும் தருகின்றவற்றை மரியாதையின் பொருட்டும், நன்றி செலுத்தவும் வணங்கினர். அதனடிப்படையில் மனிதர்களின் இன்பத்திற்கும், இனப் பெருக்கத்திற்கும் காரணமாய் அமைந்த ஆண் பெண் உறுப்புகளை இணைத்து நன்றியும், மரியாதையும் செலுத்தினர். அதுவே பின்னாளில் ஆரியர்களின் திரிபு வேலையால், புராணம் புனையப்பட்டு, சிவலிங்க வழிபாடாக்கப்-பட்டது. அதேபோல் குலப் பெரியோர், வீரர், பத்தினிப் பெண்டிர், நிலத் தலைவர் வழிபாடெல்லாம் அம்மன், முருகன், மாயோன், வருணன் வழிபாடுகளாக மாற்றப்பட்டன. இதே அடிப்படையில் வேளாண் விளைவிற்குத் துணைநிற்கும் மழை, சூரியன், மாடு, உழைப்பாளிகளை மதிக்க, நன்றி சொல்ல தமிழர்கள் கொண்டாடிய அறிவிற்குகந்த, பண்பாட்டைப் பறைசாற்றும், நன்றி விழாவான பொங்கல் விழாவிலும் தங்கள் மூடக் கருத்துக்-களை, சடங்குகளை, புராணங்களைப் புகுத்தினர். பொங்கல் என்பது அறுவடைத் திருவிழா. விளைவித்த விளைபொருள் களம் கண்ட மகிழ்வில், அந்த விளைவிற்குக் காரண-மானவற்றை மதிக்கும் முகத்தான், முதலில் மழைக்கு நன்றி கூறினர். அது மழைத்திருநாள் ஆகும். மழை அன்றைய தினம் பொழியாது என்பதால், மழையின் அடையாளமாக ஒரு சொம்பில் தண்ணீர் வைத்து அதற்கு மரியாதை செலுத்தினர். ஆனால், ஆரியப் பார்ப்பனர்கள் இந்த அர்த்தமுள்ள விழாவில் தங்கள் பண்பாட்டை நுழைத்தனர். மழைக்கு அதிபதி இந்திரன். இந்திரனுக்கு போகி என்று ஒரு பெயர் உண்டு. எனவே, மழைக்குக் காரணமான இந்திரனைக் குறிக்கும் போகி என்ற பெயரை மழைத் திருநாளுக்கு மாற்றாக நுழைத்து, மழைத் திருநாளை போகிப் பண்டிகையாக்கினர். மழைக்கதிபதியாக இந்திரன் இருக்க, கரிய மாலை (திருமாலை), மழையின் பலன் பெற்றதற்காக வழிபட மக்களுக்குக் கட்டளை யிட்டதால், வருணன் கோபம் கொண்டு பெரும் மழையைப் பெய்யச் செய்ய, இதனால் உயிரினங்கள் மழையால் பாதிக்கப்பட, கிருஷ்ணன் கோவர்த்தன மலையைக் குடையாய் பிடித்துக் காக்க, இந்திரன் தன் தோல்வியை ஒப்பி வெட்கிக் குனிந்து நிற்க, இந்திரனை மன்னித்து அவனுக்கும் சிறப்பு செய்ய, சங்கராந்திக்கு முதல் நாள் இந்திரன் என்ற போகிக்கு போகிப் பண்டிகை கொண்டாட கிருஷ்ணன் கட்டளையிட்டான். இதுவே போகி என்று புராணக் கதையைக் கூறி, மழைத் திருநாளை போகிப் பண்டிகையாக்கினர். போகி என்பதை காலப்போக்கில் போக்குதல் என்று பொருள் கொண்டு, வீட்டிலுள்ள பழைய பொருள்களைக் போக்குதல் என்று முடிவு செய்து, பழைய நூல்கள் உள்பட எல்லா வற்றையும் தெருவிலிட்டுத் தீ வைத்தனர். நாடு முழுவதும் ஒரே நேரத்தில் அவையெல்லாம் கொளுத்தப்படுவதால் காற்று மண்டலமே கரும்புகை மண்டலமாக மாறி, மூச்சுக் கோளாறுகளையும், மற்றக் கேடுகளையும் உருவாக்கி வருகிறது. ஆக, ஆரியப் பார்ப்பன பண்பாட்டுப் படையெடுப்பால், அர்த்தமுள்ள மழைப் பண்டிகை, போகிப் பண்டிகையாக மாற்றப்பட்டு, புகைப் பண்டிகையாகி, கேடு விளைவிக்கிறது. சூரியத் திருநாளை மகர சங்கராந்தியாக மாற்றிய சதி: பொங்கல் திருநாள், பெரும் பொங்கல் என்று தமிழர்களால் அழைக்கப்படும். இந்த நாள் தமிழரின் முதன்மையான திருநாளும் ஆகும். காரணம், அன்றுதான் தமிழ்ப் புத்தாண்டு தொடங்குகிறது. மூன்றாம் நாள் மாட்டுப் பொங்கல் வேளாண் உற்பத்திக்கு மழை, சூரியன் இவற்றிற்கு அடுத்தது மாடுகள் கட்டாயம். காரணம், ஏர் உழப் பயன்படுவதோடு, வேளாண்மைக்குத் தேவையான உரம் கிடைக்கவும் மாட்டுக் கழிவுகள் பயன் படுகின்றன என்பதாலும், மாடுகள் உழவனின் தோழன் என்பதாலும், உழவனின் செல்வம் என்கிற சிறப்பாலும் மாடுகளுக்கு ஒரு திருநாள் கொண்டாடினர் தமிழர். இது பண்பாட்டின் அடிப்படையில் நன்றி செலுத்தும் நோக்கில், உதவியாய் அமைந்தவற்றிற்கு உரிய சிறப்பு செய்யும் உணர்வில் உருவாக்கப்பட்டது. மாட்டுப் பொங்கல் தமிழரின் நன்றி கூறும் பண்பாட்டின் அடையாளம். ஆனால், இதையும் புராணக் கதையைப் புகுத்தி புரட்டு வேலை செய்து மாற்றினர். இந்திரன் கோபத்தால் கடும் மழை பெய்யச் செய்ததால் மாடுகள் மிகவும் சிரமப் பட்டதாகவும், பின்னர் மனம் மாறி இந்திரன் மழையை நிற்கச் செய்ததால், மறுநாள் மாடுகள் கட்டு அவிழ்த்து விடப்பட மகிழ்ச்சியில் துள்ளிப் பாய்ந்து ஓடினவென்றும், அதுவே மாட்டுப் பொங்கல் ஆனது என்றும் மாட்டுப் பொங்கலின் மாண்பிலும் மடமையைப் புகுத்தினர். தமிழர் பண்பாட்டில் ஆரியப் பண்பாட்டைப் புகுத்தினர். காணும் பொங்கலையும் கதை எழுதி திரித்தனர்! அடுத்த நாள் கொண்டாடப்படும்  காணும் பொங்கல் என்பது வேளாண் உற்பத்திக்காக உழைக்கின்ற உழைப்பாளர்களுக்கு நன்றி சொல்லவும், அவர்களைச் சிறப்பிக்கவும் தமிழர்களால் உருவாக்கப்பட்டு கொண்டாடப் படுவதாகும். அன்று உழைப்பாளிகள் நில உரிமையாளர்களைச் சென்று கண்டு, நெல், காய்கறி, துணி போன்றவற்றைப் பெறுவர். நிலத்தின் உரிமையாளர்களும் உழைத்து உற்பத்திப் பெருக்கும் உழைப்பாளிகளை மகிழ்விக்க புத்தாடை, புதுப்பானை, புத்தரிசி, கரும்பு என்று பலதும் வழங்கிச் சிறப்பிப்பர். இப்படி உழைப்பாளிகளைச் சிறப்பிக்கத் தமிழர்கள் உருவாக்கிய உழைப்பாளிப் பொங்கல் என்னும் காணும் பொங்கலையும் புராணக் கதைப்புக் கூறிப் புரட்டினர்; தங்கள் பண்பாட்டைப் புகுத்தினர். கோபங் கொண்டு இந்திரன் பொழியச் செய்த பெருமழையால் பாதிக்கப்பட்ட மக்கள் மழை நின்ற பின் ஒருவரையொருவர் கண்டு பாதிப்பு பற்றி விசாரித்தனர். அதுவே காணும் பொங்கல் என்று கதை கட்டி, காரணம் கூறினர். காணும் பொங்கலிலும் ஆரியப் பண்பாட்டை, புராண மடமையைப் புகுத்தினர். ஆண்_பெண் உறுப்பு வழிபாட்டை சிவ வழிபாடாக்க லிங்க புராணம் புனைந்ததுபோல, உற்பத்திக் காரணிகளான மழை, சூரியன், மாடு, உழைப்பாளர் என்ற நான்கு காரணிகளுக்கு நன்றி கூறி, அவற்றைச் சிறப்பிக்கக் கொண்டாடப்பட்ட பகுத்தறிவின் பாற்பட்ட தமிழரின் பண்பாட்டு விழாவை, புராணக் கதைகளைக் கூறி தங்கள் பண்பாட்டுப் பண்டிகையாகத் திரித்து, தமிழர் பண்பாட்டைச் சீரழித்தனர். எனவே, மூடநம்பிக்கையற்ற தொன்மைத் தமிழர்களின் பகுத்தறிவுத் (நாத்திகத்) திருவிழா பொங்கல் விழா என்பதை நன்கு புரிந்துகொண்டு, அதில் மூடநம்பிக்கை, ஜாதி, மதம், நுழைவதை விலக்கி உலகுக்கு உகந்த மனிதநேய விழாவாகக் கொண்டாட வேண்டியது நமது கடமையாகும். அதுவே ஆரிய பண்பாட்டு ஊடுருவலை வெளியேற்றும் வழியுமாகும். குறிப்பு: திராவிடர் திருநாள் என்று அழைப்பது ஏன்? இதற்கான விளக்கத்தை சென்ற இதழின் ஆசிரியரின் தலையங்கத்தைப் படித்து அறியவும்.செய்திகளை பகிர்ந்து கொள்ள

கவிதை : தமிழர்க்கொரு திருநாள்!

தமிழர்க் கொரு திருநாள் - அது தைத்திங்கள் முதல் நாள் சமயத்துறை அறவே - உயர் தமிழ் வாழ்த்தும் பெருநாள்.   நமை ஒப்பார் யாவர்? - நம் தமிழ் ஒப்பது யாது? கமழ் பொங்கல் நன்னாள் - புதுக் கதிர் கண்ட பொன்னாள்!   ஏரோட்டும் இரு தோள் - ஒரு சீர் போற்றும் திருநாள்! ஆரோடும் உண்ணும் - நெல் அறுவடை செய் பெருநாள்!   போராடும் கூர் வாள் - பகை போக்குவ தோர் பெருநாள்! ஊரோடும் உறவோடும் உள மகிழும் திருநாள்.   மாடுகளும் கன்றுகளும் வாழியவே என்று பாடுகின்ற நன்னாள்! - கொண் டாடுகின்ற பொன்னாள்!   வீடுதெரு வெங்கும் - எழிற் சோடனை விளங்கும் நீடுதமிழ் நாடு - புகழ் நீட்டுகின்ற திருநாள்! - ‘குயில்’ 12.1.1960 - புரட்சிக்கவிஞர் பாரதிதாசன்செய்திகளை பகிர்ந்து கொள்ள