அடிமைகளா தமிழரெலாம்? தன்மா னத்தை
அடகுவைத்துத் திரிகின்ற இனமா நாமும்?
குடியாட்சி மாண்புதனை முடிந்த மட்டும்
குழிதோண்டிப் புதைக்கின்ற கொடுமை என்னே!
அடியாட்கள், அதிகாரம் வரம்பு மீற
அந்நாளின் உரிமையெலாம் பறித்தல் கண்டும்
நடிப்பாரை மிகநம்பிக் கெட்டார்; நாட்டின்
நடப்பினையே உணராமல் தவிக்க லானார்!
தமிழகத்தைப் பாலைவனம் ஆக்கு தற்கே
தடித்தனமாய் வடவரிங்கே முயலு கின்றார்;
தமிழரையே விலைகொடுத்து வாங்கு தற்கே
தன்மானம் இல்லாரைத் தேடிக் கண்டு
தமிழ்நாட்டை வளைத்துவிட எண்ணு கின்றார்
தக்கைகளா வெள்ளத்தைத் தடுக்கும்? நெஞ்சம்
நிமிர்ந்தெழுந்தே நெருப்பாகும்; நரிக்கூட் டத்தை
நெருங்காமல் கதிகலங்க விரட்டு வார்கள்!
குற்றங்கள் இழைத்துவரும் கொடியர் தம்மைக்
கூலிகளாய் வாலாட்டும் ஏவல் நாயாய்
முற்றாகத் தலையாட்டிப் பொம்மை யாக்கி
முன்னேற்றக் கதவுகளை மூடி விட்டார்;
குற்றுமியை, நெற்பதரைத் துணையாய்க் கொண்டு
குளிர்காய எண்ணுகிறார்; பெரியார் மண்ணில்
வெற்றர்தம் கனவனைத்தும் விழலுக்கு நீராகும்;
வெள்ளாடா வேங்கையினை வீழ்த்தும்; வெல்லும்?
- முனைவர் கடவூர் மணிமாறன்
